८ असोज, काठमाडौं- वाइडबडी जहाज र सेक्युरिटी प्रिन्टिङ प्रेस खरिद प्रकरणमा अख्तियारको छानबिनबारे सार्वजनिक लेखा समितिले चासो दिएको छ ।

वाइडबडी विमान खरिदमा ४ अर्ब ३५ करोड ५६ लाख रुपैयाँ भ्रष्टाचार भएको ठहर गर्दै आवश्यक अनुसन्धान गरी कारबाही गर्न भन्दै संसदको लेखा समितिले दुई वर्ष अगाडि अख्तियारलाई पत्राचार गरेपनी हालसम्म त्यसको अनुसन्धानको प्रगतिबारे अख्तियारले जानकारी नगराएको भन्दै लेखाले विवरण माग गरेको लेखा समितिका सचिव डा.रोजनाथ पाण्डेले जानकारी दिए ।

समितीका सचिव डा.पाण्डेका अनुसार, बिहिवार सार्वजनिक लेखा समितिले, वाइडबडी जहाज र सेक्युरिटी प्रिन्टिङ प्रेस खरिद प्रकरणमा भएको भ्रष्टाचारको छानबिनबारे अख्तियार दुरुपयोग अनुसन्धान आयोगसँग विवरण समेत माग गरेको छ । “वाइडबडी विमान खरिदमा लेखा समितिले ४ अर्ब ३५ करोड ५६ लाख रुपैयाँ भ्रष्टाचार भएको ठहर गर्दै आवश्यक अनुसन्धान गरी कारबाही गर्न करिब दुई वर्ष अगाडि अख्तियारलाई पत्राचार गरेको थियो । तर, हालसम्म त्यसको अनुसन्धानका विषयमा भएको प्रगतिबारे जानकारी नभएको भन्दै लेखाले विवरण माग गरेको हो ।” डा.पाण्डेले बताए ।

अख्तियारले करिब ६ महिनाअघि अनुसन्धानको बिषयप्रती चासो दिंदै पत्र काट्दा अनुसन्धान हुँदै गरेको भन्ने जवाफ आएको उल्लेख गर्दै सचिव डा.पाण्डेले बिहिवार पुनः पत्र लेखिएको हेडलाईन नेपाललाई जानकारी दिए ।

उता महालेखा परीक्षकको कार्यालयले ५५ औं वार्षिक प्रतिवेदनले पनि वाइडबडी खरिद प्रक्रियामा प्रश्न उठाएको र महालेखाको प्रतिवेदनलाई नै आधार बनाएर लेखा समितिले छानविन गरेको पाण्डेले बताए । महालेखा परीक्षकको कार्यालयले पनी, वायु सेवा निगमले वाइड बडी विमान खरिद गर्न गत २०१७ मार्च १ मा १० लाख र २०१७ जून १९मा ७ करोड ९० लाख गरी ८ करोड अमेरिकी डलर पेस्की दिएको भन्दै उक्त प्रकरणमा अनियमितता भएको दाबी गरेको थियो ।

वाइडबडी विमान खरिद प्रकरणमा तत्कालिन पर्यटनमन्त्री रवीन्द्र अधिकारी, पूर्वमन्त्रीहरु जीवनबहादुर शाही र जीतेन्द्र देव, सचिवहरु, निगमका महाप्रबन्धक सुगतरत्न कंसाकारमाथि समेत अनियमितताको आरोप लागेको छ ।

सेक्युरिटी प्रिन्टिङ प्रेस खरिद प्रकरणको छानबिन तामेलीमा राख्न खोजेको लेखा समितीको आशंका

यता सेक्युरिटी प्रिन्टिङ प्रेस खरिद प्रकरणको छानबिनको फाईल पनि अख्तियारले तामेलीमा राखेकोे चर्चा भएको भन्दै सार्वजनीक लेखा समितीले चासो देखाएको छ ।

सेक्युरिटी प्रिन्टिङ प्रेस खरिद प्रकरणको छानबिनको फाईल पनि अख्तियारले तामेलीमा राखेको चर्चा भएको भन्दै लेखा समितिले अख्तियारलाई पत्र पठाएको छ । ‘साँच्चै तामेलीमा राखिसकेको हो कि अनुसन्धान भइरहेको हो ? अनुसन्धान भइरहेको भए प्रगति विवरण के छ ?’ लेखाले सोधेको छ । लेखा समिती सचिव डा. पाण्डेले बताए ।

गत केहि महिना अघीमात्र सेक्युरिटी प्रिन्टिङ प्रेस खरिद सम्बन्धमा ७० करोड कमिसनको मोलमोलाइ भएको अडियो टेप सार्वजनिक भएपछि तत्कालीन सञ्चार तथा सूचना प्रविधिमन्त्री गोकुल बास्कोटाले राजीनामा दिएका थिए ।

स्वीट्जरल्याण्डको केबीए–नोटासिस एसए कम्पनीको नेपाल प्रतिनिधि दाबी गर्ने विजयप्रकाश मिश्रले बास्कोटाले सेक्युरिटी प्रिन्टिङ प्रेस खरिदमा करिब ७० करोड कमिसन मागेको आरोप लगाउँदै त्यससम्बन्धी अडियो टेप सार्वजनिक गराएका थिए । यद्धपी तिनै विजयप्रकाश मिश्र अडियो रेकर्डको अन्य प्रमाण जुटाउन भन्दै जापानमा बस्दै आएको बताउने गरेका छन् ।

अख्तियारप्रमुखमा ‘नवीनप्रवृत्ति’भन्दा कुलमान, सञ्जेल तथा केसीप्रवृत्ति आवश्यक