त्रिशूली नदीमा २१ सवारीसाधन खस्यो : ५५ जना बेपत्ता

चितवन – बितेका आठ वर्षको अवधीमा नारायणगढ – मुग्लिन र पृथ्वी राजमार्गको मुग्लिन – मौवाखोला सडकखण्डमा २१ वटा सवारीसाधन त्रिशूली नदीमा खसेका छन् ।

उक्त दुर्घटनामा परी हालसम्म ५५ जना बेपत्ता भएका छन् । बेपत्ताहरुको सूचीमा पूर्वगृहमन्त्री एवं परराष्ट्रमन्त्री माधवप्रसाद घिमिरेलगायत रहेको जिल्ला ट्राफिक प्रहरी कार्यालय चितवनले जनाएको छ । ट्राफिक प्रहरी कार्यालयका अनुसार आ.व २०७३/७४ मा पाँचवटा, २०७४/७५ मा चारवटा, २०७५/७६ मा चारवटा सवारीसाधन बेपत्ता भएका छन् ।

त्यस्तै आ.व २०७६/७७ मा एउटा, २०७७/७८ मा एउटा, २०७९/८० मा एउटा र २०८०/८१ मा पाँचवटा सवारीसाधन त्रिशूली नदीमा खसेर बेपत्ता भएका छन् । बेपत्ता भएका सवारी साधनमध्येबाट आ.व २०७३/७४ मा १४, २०७८/७९ मा ४ र २०८०/८१ मा ३७ जना बेपत्ता भएको ट्राफिक प्रहरी कार्यालयको तथ्यांकमा उल्लेख छ ।

उक्त अवधिमा सो सडकखण्डमा ६६ वटा सवारी साधन दुर्घटना भएका थिए । आव २०७३/७४ देखि आव २०८०/८१ सम्ममा ४० ट्रक, नौ बस, १२ कार, तीन मोटरसाइकल र दुईवटा अन्य सवारीसाधन दुर्घटनामा परेका हुन् ।