संसद भवनभित्र मृत भेटिएका प्रहरी जवानले आत्महत्या गरेको प्रारम्भिक निष्कर्ष

काठमाडौं – नयाँ बानेश्वरस्थित संघिय संसद भवन परिषरमा मृत अवस्थामा भेटिएका प्रहरी जवान अजित गोलेले आत्महत्या गरेको पाइृएको छ ।

दोलखाको मेलुङ–४ घर भएका २२ वर्षीय प्रहरी जवान अजित गोलेले आफैंले बोकेको इन्सास राइफलले आफैंलाई गोली हानी आत्महत्या गरेको पाइएको जिल्ला प्रहरी परिसरले जनाएको छ ।

एसपी तथा प्रवक्ता नवराज अधिकारीका अनुसार गोलेले आफ्नै निधारमा गोली हानेको देखिएको छ । उनको शव बुधबार बिहान संसद भवनको पश्चिमतर्फको २ नम्बर गेटको बायाँतर्फ रहेको शौचालयमा भेटिएको थियो । उनी आजै बिहान ६ बजेदेखि १० बजेसम्मको ड्युटी पालोमा २ नम्बर गेटमा हतियारसहित सुरक्षार्थ खटिएका थिए ।

प्रहरीको केन्द्रीय विशेष कार्यदलमा दरबन्दी रही उनी संसद भवनमा खटिँदै आएका थिए ।