अमिरका कारण रोकिएको वेलकम–३ को प्रदर्शन

मुम्बई – बहुप्रतिक्षित चलचित्र वेलकम–३ (वेलकम टु द जंगल) यो वर्षको अन्त्यमा रिलिज नहुने भएको छ । नयाँ रिपोर्टअनुसार चलचित्र अब लामो समयपछि मात्र सिनेमा घरमा हेर्न पाइनेछ । चलचित्रलाई २० डिसेम्बरमा रिलिज गर्ने तयारी गरिएको थियो ।

उता, चलचित्र ‘सितारे जमिन पर’ को सुटिङ सकिएको छ । यो चलचित्र क्रिसमसमा रिलिज गर्न लागिएको छ । रिपोर्टका अनुसार ‘सितारे जमिन पर’सँग चलचित्रलाई नजुधाउन ‘वेलकम–३’ को रिलिज मितिमा परिवर्तन गरिएको हो ।

‘सितारे जमिन पर’मा आमिर खानसँग जेनेलिया डिसुजा देखिँदैछिन् । त्यस्तै, ‘वेलकम–३’ मा अक्षय कुमारसहित सुनील शेट्टी, अरशद वारसी, परेश रावल, जोनी लिभर, राजपाल यादव, तुषार कपूर, श्रेयस तलपडे, रवीना टन्डन, लारा दत्त, ज्याकलिन फर्नान्डिस, दिशा पटानीजस्ता कलारहरूको अभिनय रहेको छ ।

‘वेलकम–३’ सँग जोडिएका एक स्रोतका अनुसार चलचित्रको पहिलो सुटिङ मेमा सकिएको थियो । चलचित्रमा भिएफएक्सको पनि प्रयोग गरिएको छ । यसमा काम गर्न अझै बाँकी छ । यस्तोमा यही वर्ष चलचित्र रिलिज गर्न नसकिने उनको भनाइ छ ।

‘वेलकम–३’ शृंखलाको पहिलो २ फिल्म रिलिज भइसकेका छन् । सन् २००७ मा ‘वेलकम’ र २०१५ मा ‘वेलकम ब्याक’ रिलिज भएको थियो । यस चलचित्रलाई अनीस बाज्मीले निर्देशन र फिरोज नाडियाडवालाले निर्माण गरेका हुन् ।