काभ्रेमा बोधिचित्तको रुख काटेको आरोपमा चार जना पक्राउ

काठमाडौं– काभ्रेको रोशी गाउँपालिका–५ नागबेलीमा रहेको बहुमूल्य बोधिचित्तको रुख काटेको आरोपमा प्रहरीले चार जनालाई पक्राउ गरेको छ ।

पक्राउ पर्नेमा स्थानीय प्रभात तामाङ, श्यामकृष्ण मैनाली, मानबहादुर तामाङ र दुर्गालाल तामाङ रहेका जिल्ला प्रहरी कार्यालय काभ्रेका प्रवक्ता एवम् प्रहरी नायब उपरीक्षक राजकुमार श्रेष्ठले जानकारी दिए ।

उनीहरूले गएको बिहीवार राति नागबेलीमा रहेको ठाकुरानी तामाङको बगैँचामा रहेको बहुमूल्य बोधिचित्तको एउटा रुख काटेको प्रहरीले जनाएको छ । काटिएको रुखमा फल्ने बोधिचित्त दाना यस वर्ष तीन करोड रुपैयाँमा बिक्री गर्न बैना गरिएको थियो ।

प्रहरीका अनुसार रुख काटेपछि उनीहरूले रुखधनी तामाङको घरका ढोका र आँगनमा चार सकेट बम राखेका थिए ।