मोटरसाइकल र स्कुटर ठोक्किँदा भक्तपुरमा एक जनाको मृत्यु

काठमाडौं– भक्तपुरमा मोटरसाइकल र स्कुटर एक आपसमा ठोक्किँदा एक जनाको मृत्यु भएको छ ।

मंगलबार साँझ साढे ६ बजे भक्तपुर नगरपालिका–१ चुनदेवी आकाशे पुल नजिकै सल्लाघारीबाट सूर्यविनायक जाँदै गरेको मोटरसाइकल बागमती प्रदेश ०२–०२२ प ८७३२ नं.ले बागमती प्रदेश ०२–०२१ प ९०३२ नं. स्कुटरलाई ठक्कर दिएको थियो ।

दुर्घटनामा मोटरसाइकल चालक भक्तपुरको सूर्यविनायक नगरपालिका–६ पाण्डुबजारका २० वर्षीय ओम केसी गम्भीर घाइते भएका थिए ।

उनको उपचारको क्रममा मंगलबार राती मध्यपुर अस्पतालमा मृत्यु भएको जिल्ला प्रहरी परिसर भक्तपुरका प्रहरी नायव उपरीक्षक बसन्त पाठकले जानकारी दिए ।

स्कुटर र चालक सिन्धुपाल्चोक मेलम्ची नगरपालिका–८ घर भई काठमाडौं कपन बस्ने २६ वर्षीय रोशन तामाङलाई प्रहरीले नियन्त्रणमा लिएको छ ।