मुख्यमन्त्री यादवद्वारा एक वर्षे कार्यप्रगति सार्वजनिक

जनकपुरधाम – मधेस प्रदेश सरकारले एक वर्षको कार्य प्रगति विवरण सार्वजनिक गरेको छ । मधेस स्वाभिमान दिवसको उपलक्ष्यमा बुधबार मुख्यमन्त्री सरोजकुमार यादवले एक वर्षको अवधिमा सम्पन्न गरेका विभिन्न कार्यहरूको विवरण सार्वजनिक गरेका छन् । मुख्यमन्त्री यादवले आफ्नो कार्यकालको एक वर्षमा सफलताका साथ कार्य सम्पादन गरेको दाबी गरेका छन् ।

भौतिक विकासतर्फ रामजानकी बहुउद्देश्य रंगशालालाई प्रदेश गौरव योजनाको रूपमा राखेर अन्तर्राष्ट्रिय स्तरको रंगशालाको रूपमा निर्माण कार्य सुुरु गरिएको, एक निर्वाचन क्षेत्र एक सडक कार्यक्रमअन्तर्गत ३५ किलोमिटर कालोपत्रे सडक निर्माण, आठ वटा पूल निर्माण, प्रादेशिक सडक सञ्जाल निर्माणका लागि गुरुयोजना निर्माण लगायतका निर्माण कार्य गरिएको प्रगति विवरणमा समेटिएको छ । सिँचाइका विभिन्न पाँच वटा योजनाहरू सम्पन्न भएर १ हजार १ सय ४० हेक्टर जग्गा सिञ्चित गरिएको, भूमिगत सिँचाइतर्फ ४५ वटा डिप ट्युबवेल र १५ वटा पावर ड्रिल निर्माण भई करिब ९ सय ८० हेक्टर जग्गामा थप सिँचाइ सुविधा उपलब्ध गराइएको मुख्यमन्त्री यादवले बताए ।

प्रदेशस्तरका नदी तथा खोलाहरूको नियन्त्रण कार्य आठ वटा जिल्लाहरूमा ८ सय १० किलोमिटर सम्पन्न भई ८ सय ५० हेक्टर जग्गा उकास भएको र आठ वटा अति जोखिमयुक्त वस्तीहरूको संरक्षण भएको मुख्यमन्त्री यादवले बताए ।

प्रदेश सरकारअन्तर्गत सञ्चालित जलेश्वर, पोखरिया, भारदह र डुमरिया अस्पताललाई ५० बेडमा स्तरोन्नति, नारायणी अस्पताल वीरगञ्ज, गजेन्द्रनारायण सिंहअस्पताल राजविराज र प्रादेशिक अस्पताल जनकपुरमा २५÷२५ बेड र कलैया, गौर, मलंगवा, जलेश्वर र सिरहा अस्पतालमा १५÷१५ बेडको एचडियु स्थापना गरी सेवा प्रदान, प्रदेश सरकारले स्वास्थ्य क्षेत्रमा लगानी गरेपछि प्रदेशमा बसोवास गर्ने व्यक्तिको औसत आयु ७१ दशमलव ५ वर्ष पुगी बाल तथा मातृ मृत्यु दरमा सुधार आउनुलाई प्रदेश सरकारले स्वास्थ्य क्षेत्रको उपलब्धिमा राखेको छ ।

आफ्ना सरकारका १० जना मन्त्रीहरूलाई छेउमै राखेर पत्रकार र सरकारका अंगहरू समेतको सहभागितामा प्रगति विवरण सार्वजनिक गरेका मुख्यमन्त्री यादवले भ्रष्टाचार हुन नदिएको र बुलेट ट्रेनकै गतिमा काम गरिरहेको दोहराए । उनले किताब जस्तै निकालेको कार्यप्रगतिमा यसभन्दा पहिलेका मुख्यमन्त्री लालबाबु राउतले पाँच वर्षमा गर्न नसकेको काम आफूले एक वर्षमै गरेको दावी गरेका छन् ।

प्रदेश सरकारको विषयमा सञ्चारकर्मीहरूले प्रश्न सोधेपछि मुख्यमन्त्री यादवले आंशिक जवाफ दिएर पन्छिएका थिए । सञ्चारकर्मीहरूको जवाफ दिन माइक समातेका मुख्यमन्त्री यादवलाई जनमत पार्टीका कार्यकर्ताले कार्यक्रमस्थलमै गएर भ्रष्टाचारी सरकार भनेर विरोध जनाएपछि उनी रिसाएका थिए । मुख्यमन्त्री यादवले साइकल काण्ड र भ्रष्टाचार आफ्नो सरकारले नगरहेको भन्दै पन्छिएका थिए । जनमत पार्टीका सचिव विपी साह नेतृत्वको समूहले ‘भ्रष्टाचारी सरकार मुर्दावाद, साइकल चोरलाई कारबाही गर’ सहितका नाराबाजी गरेका थिए । विरोधलाई शान्तिपूर्वक सुनेका र सामना गरेका मुख्यमन्त्री यादव प्रदर्शनकारी बाहिरएपछि भने, ‘मेरो सरकारले साइकल काण्ड गरेको हो ?, अनि जनमतको के चाला हो यस्तो ? मेरो सरकार पनि भ्रष्टाचारी हो भने यो सरकारमा किन बस्नुप¥यो ?’ कार्यक्रममा मधेस प्रदेश सरकारका मन्त्री, विभिन्न पार्टीका कार्यकर्ता एवं सञ्चारकर्मीहरूको उपस्थिति रहेको थियो ।