३१ अङ्कले बढ्यो नेप्से, ५ अर्ब बढीको कारोबार

काठमाडौं– आज सेयर बजार उच्च अङ्कले बढेर हरियाली भएको छ । सेयर बजार परिसूचक नेप्से आज ३१ दशमलव ६२ अङ्कले बढेर दुई हजार एक सय २० दशमलव ६२ विन्दुमा पुगेको छ ।

आज होटल तथा पर्यटनबाहेक अरू सबै समूहको सेयर बढेकोमा जलविद्युत्, फाइनान्स र अन्य समूहको सेयर उच्च अङ्कले उकालो लागेको छ ।

आज ११ वटा कम्पनीको सेयर १० प्रतिशतले बढेर सकारात्मक ’सर्किट’ लागेको छ । समग्रमा बजार हरियाली भएको दिन आज मेगा म्युचल फन्ड–१ को सेयर साढे नौ प्रतिशतले घटेको छ ।

आज एक करोड ६६ लाख पाँच हजार कित्ता सेयर पाँच अर्ब ४५ करोड चार लाख रुपैयाँमा कारोबार भएका छन् । सबैभन्दा धेरै नेपाल पुनर्बीमा कम्पनीका १२ लाख ७४ हजार कित्ता प्रमोटर सेयर ३५ करोड ६८ लाख रुपैयाँमा कारोबार भएका छन् ।