जीपको ठक्करबाट एकै विद्यालयका शिक्षक र लेखापालको मृत्यु

काठमाडौं– चितवनको माडीमा जीपले मोटरसाइकललाई ठक्कर दिँदा दुई जनाको ज्यान गएको छ ।

हिजो बेलुका माडी नगरपालिका–१ बरुवाको चिताई खोलाको पुलमा लु २ च २५०८ नम्बरको जीपले बाग्मती प्रदेश ०६००१ प ४०९३ नम्बरको मोटरसाइकललाई ठक्कर दिएको हो ।

दुर्घटनामा मोटरसाइकल चालक सोमेश्वर माध्यमिक विद्यालयका लेखापाल सूर्य अधिकारी र मोटरसाइकलको पछाडि रहेका शिक्षक बेगबहादुर खत्रीको ज्यान गएको प्रहरीले जनाएको छ । अर्का शिक्षक भवानीप्रसाद पौडेल घाइते भएका छन् ।

उनको पुरानो मेडिकल कलेज भरतपुरमा उपचार भइरहेको छ । जीप चालकलाई इलाका प्रहरी कार्यालय माडीले पक्राउ गरेको छ ।