चर्चित टिभी शो ‘सीआईडीका’ इन्स्पेक्टर फ्रेडरिकको निधन

मुम्बई– सोनी टिभीको चर्चित टिभी शो सीआईडीमा इन्स्पेक्टर फ्रेडरिकको भूमिका निभाएका अभिनेता दिनेश फडणीसको निधन भएको छ । यो कुराको पुष्टि दिनेशका साथी र को–स्टार दयानन्द शेट्टीले गरेका छन् ।

दयानन्द शेट्टीले सीआईडी शोमा इन्स्पेक्टर दयाको भूमिका निभाएका थिए । रिपोर्टका अनुसार ५७ वर्षीय दिनेशको मृत्युको कारण मल्टिपल अर्गेन फेलियर भनिएको छ । उनले सोमबार राति करिब १२ बजे मुम्बईको तुङ्गा अस्पतालमा अन्तिम सास लिए । उनको अन्तिम संस्कार आज दिउँसो मुम्बईको बोरिवली इस्टमा गरिने छ ।

दिनेश फडणीसले सन् १९९८ मा सुरु भएको टेलिभिजन कार्यक्रम सीआईडीबाट विशेष पहिचान पाएका थिए । सुरुका केही एपिसोडहरूमा उनले कठोर पुलिस इन्स्पेक्टर फ्रेडरिक्सको भूमिका खेले । यद्यपि पछि उनी हास्य कलाकारको रूपमा परिचित हुन थाले ।

यो शो सन् २०१८ सम्म सोनी टिभीमा प्रसारण भएको थियो । कोभिड लकडाउनको समयमा पनि, सीआईडीका केही एपिसोडहरू पुनः प्रसारण गरिएको थियो । टिभी शो बाहेक, दिनेशले मराठी फिल्महरूमा काम गरेका छन् ।