सेयर बजारमा दोहोरो अङ्कको गिरावट

काठमाडौं – हिजो आइतवार उच्च अङ्कले बढेको सेयर बजार आज दोहोरो अङ्कले घटेको छ । सेयर बजार परिसूचक नेप्से आज ११ दशमलव २७ अङ्कले घटेर एक हजार आठ सय ९६ दशमलव ६७ विन्दुमा झरेको छ ।

आज होटल तथा पर्यटन, लगानी, म्युचल फन्ड र व्यापारबाहेक अरू सबै समूहको सेयर घटेको छ । सबैभन्दा धेरै स्वाभिमान लघुवित्तको सेयर आठ प्रतिशतभन्दा धेरैले घटेको छ । समग्रमा बजार घटेको दिन आज अपर स्याङ्गे हाइड्रोपावरको सेयर १० प्रतिशतले बढेको छ ।

आज बजारसँगै कारोबार रकममा पनि कमी आएको छ । आज ६० लाख कित्ता सेयर एक अर्ब ७५ करोड रुपैयाँमा कारोबार भएका छन् ।

सबैभन्दा धेरै सोनापुर मिनरल्स एन्ड आयल कम्पनीको सात करोड ७७ लाख रुपैयाँको सेयर किनबेच भएको छ ।