रत्नपार्क–सूर्यविनायक द्रुत बस सेवा आजदेखि फेरि सञ्चालनमा

काठमाडौं– रत्नपार्क–भक्तपुरको सूर्यविनायक द्रुत बस सेवा फेरि आजदेखि सञ्चालनमा आएको छ । आजदेखि थप ११ वटा बस थपेर सेवा सञ्चालनमा आउन लागेको हो ।

यसअघि सञ्चालनमा रहेका २५ वटा र थपिएका गरी अब ३६ वटा द्रुत बस पिक आवरमा चल्नेछन् ।

आज बिहान साढे ८ बजेदेखि सूर्यविनायकबाट बस सञ्चालन भएको छ । अहिलेलाई बिहान साढे ८ बजेदेखि साढे १० बजेसम्म तीन÷तीन मिनेटको फरकमा सूर्यविनायकबाट बस छुट्नेछन् ।

दिउँसो साढे ३ बजेदेखि साढे ५ बजेसम्म रत्नपार्कदेखि बस छुट्ने समयतालिका छ । द्रुत बस सेवाका लागि सडकमा रङरोगन समेत गरिएको छ । ठाउँठाउँमा बोर्ड राखिएका छन् ।

काठमाडौं उपत्यकाको ट्राफिक व्यवस्थापन र यात्रुहरूको सहजताका लागि भनेर संविधान दिवसको अवसर पारेर गएको असोज ३ गतेदेखि द्रुत बस सेवाको शुरुवात गरिएको थियो । तर यो सेवा दशैंलगत्तै स्थगित भएको थियो ।