सिफलमा दुर्गा प्रसाईं समर्थकको प्रदर्शन

काठमाडौं– काठमाडौंस्थित सिफलमा दुर्गा प्रसाईंका समर्थकले प्रदर्शन गरेका छन् ।

आज दिँउसो सिफलमा भएको प्रदर्शनमा सहभागी हुन प्रसाईँ भक्तपुरस्थित निवासबाट प्रहरीको स्कटिङमा आएका छन् ।

प्रसाईंले तेस्रो दिनको आन्दोलन काठमाडौंको गौशाला नजिक सिफल चौरमा गरिरहेका छन् । उनको प्रदर्शनलाई लक्षित गर्दै उक्त क्षेत्रमा व्यापकरुपमा प्रहरी परिचालन गरिएको छ ।

प्रसाईँले शुक्रबारबाट तीनकुनेमा कार्यक्रम गर्ने घोषणा गरेका थिए । तर काठमाडौं जिल्ला प्रशासनले भने तीनकुनेमा कार्यक्रम गर्न अनुमति दिएका थिएन । साथै आन्दोलन गर्न तीनकुनेमा जम्मा भएका केहिलाई प्रहरीले पक्राउ गरेको थियो ।

आज भने अन्तर्राष्ट्रिय विमानस्थल नजिकै रहेकाले सुरक्षाको कारण देखाउँदै प्रसाईँलाई तीनकुनेमा प्रदर्शन गर्न नदिई सिफलमा दिइएको हो ।