केपी ओली टी–२० कपः लगातार दोस्रो जितसहित बागमती सेमिफाइनलमा

काठमाडौं– लगातार दोस्रो जितसहित बागमती केपी ओली कप टी–२० क्रिकेटको सेमिफाइनलमा पुगेको छ । आज भएको खेलमा बागमतीले कर्णाली प्रदेशलाई ९० रनले हराएको छ ।

बागमतीले दिएको १ सय ९० रनको लक्ष्य पछ्याएको कर्णाली १७ ओभर ३ बलमा ९९ रन बनाउँदा अल आउट भयो । कर्णालीका अर्जुन घर्तीले २४ र कप्तान रविन्द्र शाहीले २० रन बनाए । बलिङतर्फ बाग्मतीका कप्तान सन्दीप लामिछानेले ४ र दिपेश श्रेष्ठले २ विकेट लिए ।

यसअघि पोखरा रङ्गशालामा टस जितेर ब्याटिङ गरेको बाग्मतीले निर्धारित २० ओभरमा ६ विकेट गुमाएर १ सय ८९ रन बनायो । बाग्मतीका रित गौतमले ८२ र ईशान पाण्डेले ७० रन बनाए । बलिङतर्फ कर्णालीका दिनेश अधिकारीले ३ विकेट लिए ।

यसअघि हिजो बिहीवार भएको खेलमा बाग्मतीले मदन भण्डारी स्पोर्ट्स एकेडेमी ’रातो’ टोलीलाई १ सय ९ रनले हराएको थियो । बाग्मती दुवै खेल जितेर समूह ’ए’ को विजेता बन्दै सेमिफाइनलमा पुगेको हो ।

हिजोदेखि शुरु भएको प्रतियोगितामा ७ प्रदेशका ७ वटा टिम, विभागीय टिमहरू नेपाल पुलिस, नेपाल आर्मी, एपीएफ र मदन भण्डारी स्पोर्ट्स एकेडेमीको रातो र निलो गरी १२ टिमको सहभागिता छ ।

प्रतियोगिताको विजेताले ५ लाख र उपविजेताले २ लाख ५० हजार रुपैयाँ प्राप्त गर्नेछन् ।