‘कार्साङ’ मा शिल्पा

काठमाडौं – यम शेर्पाको निर्देशनमा बन्न लागेको चलचित्र ‘कार्साङ’ मा अभिनेत्री शिल्पा मास्के अनुबन्धित भएकी छन् ।

यस चलचित्रमा यसअघि मुख्य कलाकारमा अभिनेता दयाहाङ राई, बुद्धि तामाङ र अभिनेत्रीको रुपमा सुरक्षा पन्त र नव–कलाकार छिरिङ शेर्पाको टुंगो लागिसकेको छ । अभिनेत्री शिल्पा पनि चलचित्रमा भित्रिएपछि ३ जना अभिनेत्रीले चलचित्रमा काम गर्ने पक्का भएको हो ।

निर्देशक शेर्पाले चलचित्रमा शिल्पा अनुबन्धित भएसँगै प्रमुख कलाकारको लाइनअप पूरा भएको जानकारी दिए । शेर्पाको यो डेब्यू निर्देशकीय चलचित्र हो । चलचित्रमा उनी स्वयम्को कथा, पटकथा तथा संवाद छ । यसअघि शेर्पाले थुप्रै छोटा चलचित्रको निर्देशन गरिसकेका छन् । ‘कार्साङ’ शेर्पा जातिको सामाजिक कथावस्तुमा निर्माण हुने बताइएको छ ।

पुरुषोत्तम प्रधानको छायांकन रहने यो चलचित्र यार्सा फिल्मस्को ब्यानरमा निर्माण हुन लागेको हो । निर्माण पक्षका अनुसार चलचित्रको केही दिनमै बाह्रबिसे नगरपालिका र भोटेकोसी गाउँपालिका विभिन्न स्थानमा छायांकन गरिने छ । ‘कार्साङ’ को ओभरसिज राइट्स छायांकनअगावै बिक्रीसमेत भइसकेको छ । यो चलचित्रलाई अन्तर्राष्ट्रिय बजारमा सेभेन सिज इन्टरटेनमेन्ट कम्पनीले सार्वजनिक गर्ने निर्माण पक्षले जनाएको छ । चलचित्रको देशभर वितरणको जिम्मेवारी आरआर फिल्म्स्ले लिएको छ ।