कोइलाबाट सल्केको आगोले खोटाङमा १५ लाख बराबरको क्षति, एक बालिका घाइते

काठमाडौं– खोटाङमा ब्रोइलर कुखुराको चल्लालाई तातो दिन बालेको कोइलाबाट आगो सल्किँदा खोटाङमा एक घर जलेको छ । केपिलासगढी गाउँपालिका–४ बाक्सिलाका किशोर दुमी राईको घरमा आगलागी भएको हो ।

घरमा आगो लागेपछि भाग्न खोज्दा उनकी भान्जी १५ वर्षीया सरिता तामाङ घाइते भएकी छन् । उनलाई उपचारका लागि काठमाडौं पठाइएको प्रहरीले जनाएको छ ।

आगलागीबाट तीन तले घरसँगै घरमा राखिएको दुई तोला सुन, चार तोला चाँदी, ब्रोइलर कुखुराको १५ वटा चल्ला, अन्नपात, भाँडावर्तन, काठपात, लत्ताकपडालगायत जलेर नष्ट हुँदा झन्डै १५ लाख रुपैयाँ बराबरको क्षति भएको जिल्ला प्रहरी कार्यालय खोटाङका डीएसपी पुरुषोत्तम खड्काले जानकारी दिए ।