विश्वकपको दोस्रो सेमिफाइनलमा अस्ट्रेलिया र दक्षिण अफ्रिका भिड्दै

काठमाडौँ – आईसीसी एकदिवसीय विश्वकपको दोस्रो सेमिफाइनल खेलमा बिहीबार दक्षिण अफ्रिकाले बलियो प्रतिद्वन्द्वी अस्ट्रेलियाको सामना गर्दैछ ।

उक्त खेल नेपाली समयअनुसार, दिउँसो २ः१५ बजे कोलकातास्थित ऐतिहासिक इडेन गार्डेन स्टेडियममा सुरु हुनेछ ।

दक्षिण अफ्रिकाले हालसम्म एकदिवसीय विश्वकपको उपाधि जितेको छैन भने अस्ट्रेलिया पाँचपटकको विश्व च्याम्पियन हो । जारी विश्वकपमा भने दक्षिण अफ्रिका निकै लयमा देखिएको छ । प्रारम्भिक चरणको खेलपछि अंक तालिकामा दक्षिण अफ्रिका दोस्रो र अस्ट्रेलिया तेस्रो हुँदै सेमिफाइनलमा पुगेका हुन् । दक्षिण अफ्रिका र अस्ट्रेलिया दुबैले प्रारम्भिक चरणमा खेलिएका नौमध्ये सात खेलमा जित हात पारेका थिए । तर, नेट रन रेटमा भने अस्ट्रेलियाभन्दा दक्षिण अफ्रिका अगाडि थियो । प्रारम्भिक चरणमा यी दुबै टोली आयोजक भारतसँग पराजित भएका थिए ।