बागमती किनारमा एक युवक मृत भेटिए

काठमाडौं– काठमाडौंको बागमती किनारमा एक जना युवक मृत भेटिएका छन् ।

आज बिहान सवा ६ बजे काठमाडौं महानगरपालिका–३१ बानेश्वर तरकारी बजार अगाडि बागमती किनारमा झाडीमा युवक मृत फेला परेको जिल्ला प्रहरी परिसर काठमाडौंका एसपी कुमोध ढुंगेलले जानकारी दिए ।

मृत भेटिएका युवक काठमाडौंको बालाजु गोलढुंगा घर भई शंखमुलमा बस्ने २० वर्षीय विकास महरा रहेका छन् । उनको शव घोप्टो परेको अवस्थामा भेटिएको हो ।

घटनास्थलबाट प्रयोग भएको सिरिञ्ज पनि बरामद भएको एसपी ढुंगेलले बताए ।

प्रारम्भिक अनुसन्धानबाट शरीरमा अन्य चोट नदेखिएको प्रहरीले जनाएको छ । घटनास्थलबाट प्रहरीले मृतकको फोन पनि बरामद गरेको छ ।

घटनास्थलको मुचुल्का गरी शव पोष्टमर्टमका लागि महाराजगंजस्थित शिक्षण अस्पताल पठाएको छ । मृत्युको कारण पोष्टमर्टमको रिपोर्टबाट खुल्ने प्रहरीले जनाएको छ ।