इजरायलमा ज्यान गुमाएका १० नेपालीको मृत्युमा आज राष्ट्रिय शोक, नेपालको राष्ट्रिय झन्डा आधा झुकाइने

काठमाडौं– नेपाल सरकारले आज राष्ट्रिय शोकको घोषणा गरेको छ ।

इजरायल घटनामा १० जना नेपालीहरुको हत्या भएपछि सरकारले आजका लागि राष्ट्रिय शोकको घोषणा गरेको हो । हिजो मंगलबार बसेको मन्त्रिपरिषद्को बैठकले आजका लागि राष्ट्रिय शोकको निर्णय गरेको हो ।

आज सबै सरकारी कार्यालयमा राष्ट्रिय झन्डा आधा झुकाइने सञ्चार तथा सूचना प्रविधि मन्त्री रेखा शर्माले जानकारी दिइन् ।

मन्त्रिपरिषद्को बैठकले इजरायलमा मारिएकाहरुका पीडित परिवारलाई जनही १० लाख रुपैयाँ राहत दिने निर्णय पनि गरेको छ ।

पश्चिम एसियाली राष्ट्र इजरायलमा गत शनिवार प्यालेष्टाइनी अतिवादी समुह हमासले अचानक आक्रमण गरे पछि ‘पढने पनि कमाउने पनि’ कार्यक्रममार्फत इजरायल पुगेका १० जना नेपालीको हत्या भएको थियो ।