सेनाको ट्रकले ठक्कर दिँदा भद्रकालीमा एक महिलाको मृत्यु

काठमाडौं– नेपाली सेनाको ट्रकले ठक्कर दिँदा स्कुटर चालकको मृत्यु भएको छ ।

बिहीबार राति साढे ७ बजे काठमाडौं महानगरपालिका–२८ स्थित भद्रकाली नजिकै सभागृह मोडमा सेनाको ७.५ टन ट्रकले ठक्कर दिँदा एक जना महिलाको मृत्यु भएको हो ।

सेनाका हुद्दा महोमद नुरेन देवानले चलाएको प्र.–३–०१–००१ग ३७०५ नं.को ७.५ टन ट्रकले बा.प्र –०२ –०१८ प ९२७७ नं.को स्कुटरलाई ठक्कर दिएको हो ।

ठक्करबाट स्कुटर चालक काठमाडौं महानगर–१३ ताहाचल बस्ने ३२ वर्षीया आकृती शर्माको मृत्यु भएको हो । ठक्करपछि घाइते भएकी उनको राष्ट्रिय ट्रमा सेन्टरमा उपचारको क्रममा राति ८ बजे मृत्यु भएको हो । घटनाबारे प्रहरीले अनुसन्धान गरिरहेको छ ।