साहित्यकार तथा पत्रकार राजेन्द्र पराजुलीको निधन

काठमाडौं– साहित्यकार तथा पत्रकार राजेन्द्र पराजुलीको निधन भएको छ । पारिवारिक स्रोतका अनुसार बिएन्डबी अस्पतालमा उपचारका क्रममा पराजुलीको मंगलबार बिहान ८ बजे निधन भएको हो ।

केही समयदेखि निमोनियाबाट ग्रसित कथाकार पराजुलीका आधा दर्जन किताब प्रकाशित भएका छन् ।

लामो समय अखबारी पत्रकारिता गरेका उनी कथाका लागि चर्चित थिए । राजनीतिक एवं सामाजिक विसंगतिप्रति कडा आलोचकीय दृष्टिकोण उनका कथाहरुमा पाइन्थ्यो ।

पराजुलीको कथासंग्रह ‘जन्तरमन्तर’ हालै मात्र प्रकाशनमा आएको थियो । उनका अघोरी, कोटेश्वरको केटो, शुक्रराज शास्त्रीको चश्मा, अनायिका, सपनामा मार्क्स, जाडोमा भोक, भ्रष्ट संवेदना, विकल्प यात्रालगायत कृति प्रकाशित छन् ।