कर्णाली नदी बस्तीमा पस्ने जोखिम : उच्च सतर्कता अपनाउन आग्रह

टीकापुर – कैलालीको टीकापुर क्षेत्रमा कर्णाली नदीले कटान तीव्र बनाएको छ ।

टीकापुर उद्यान पार्क नजिक कर्णालीले उक्त क्षेत्रको तटबन्धनको कटान तीव्र पारेकाले बस्ती जोखिममा परेको छ । पार्क क्षेत्रमा कर्णाली नदी तटबन्धन भत्किएमा टीकापुरको वडा नं ५, ६, ७, ८ र ९ वडा पूरै डुबान तथा कटानमा पर्ने जोखिम बढेको स्थानियले बताएका छन् ।

नदी कटान तीव्र भएपछि शनिबार सुदूरपश्चिम प्रदेशका मुख्यमन्त्री कमलबहादुर शाह, भौतिक पूर्वाधार विकासमन्त्री प्रकाशबहादुर देउवा, आन्तरिक मामिला तथा कानुनमन्त्री शिवराज भट्टलगायतको टोलीले त्यस क्षेत्रको अनुगमन समेत गरेका छन् । मुख्यमन्त्री शाहले नदी नियन्त्रणका लागि प्रदेश सरकारले सक्दो पहल गर्ने प्रतिबद्धता व्यक्त गरेका छन् ।

मुख्यमन्त्री शाहको प्रतिबद्धता लगत्तै नदी बस्तीमा पसेमा हजारौँ परिवारको उद्धार गर्नुपर्ने, हजारौँ बिघा धानबाली नष्ट हुने खतरा बढेपछि बस्ती जोगाउन जैविक तटबन्ध गरिने भएको छ । टीकापुर नगरपालिका विपद् व्यवस्थापन समितिको बैठकले रानी जमरा कुलरिया सिँचाइ आयोजनाको सहयोगमा स्थानीयलाई परिचालन गरी जैविक तटबन्ध गर्ने निर्णय नै गरीसकेको छ ।