फिदिममा अटो पल्टिँदा एक वृद्धाको मृत्यु, चार जना घाइते

पाँचथर – फिदिम बजारसिरानमा बुधबार बिहान अटो पल्टिँदा एक वृद्धाको मृत्यु भएको छ भने चार जना घाइते भएका छन् । फिदिम– १ शनिबारेबाट फिदिम बजारतर्फ आउँदै गरेको प्र १–०१–००१ स ८७०५ नम्बरको अटो शनिबारे नजिक दुर्घटना भएको हो ।

अनियन्त्रित भइ अटो दुर्घटना हुँदा फिदिम नगरपालिका– ६ की ५५ वर्षीया हरिमाया तुम्रोकको मृत्यु भएको प्रहरीले जनाएको छ । टाउको र चिउँडोमा गम्भीर चोट लागेको तुम्रोकको पाँचथर अस्पतालमा उपचारको क्रममा मृत्यु भएको प्रहरीले जनाएको छ ।

उक्त अटोमा सवार फिदिम– ६ बस्ने सन्देश लिम्बु, अटो चालक सोही ठाउँका दिपक लिम्बु, फिदिम ६ कि बसन्ती लिम्बु र फिदिम– ७ का कुशल लिम्बु घाइते भएको जिल्ला प्रहरी कार्यालय पाँचथरका सूचना अधिकारी मिलन थापाले जानकारी दिए । घाइतेहरुको उपचार पाँचथर अस्पतालमा भइरहेको छ ।