पहिरोले धादिङबेसी – मलेखु सडक अवरुद्ध

मलेखु – जिल्ला सदरमुकाम धादिङबेसीलाई पृथ्वी राजमार्गसँग जोड्ने धादिङबेसी – मलेखु सडकखण्ड पहिरोले अवरुद्ध भएको छ ।

आज दिउँसो १२ः३० बजे नीलकण्ठ नगरपालिका – ८ स्थित च्याडु घुम्ती नजिकै सडकमा खसेको पहिरोले सडकको दुबैतर्फ अवरुद्ध बनाएको हो । पहिरोका कारण अहिले त्यस क्षेत्रमा सवारीसाधनको आवागमन पूर्णरूपले ठप्प भएको छ । घुम्ती कटेर सडक चौडा गरेको स्थानमा कमजोर बनेको जमिन भासिएर पहिरो खसेको स्थानीयवासीले बताएका छन् ।

पहिरोले ठूल्ठूला ढुंगा र रुखसमेत खसालेकाले तत्काल बाटो खुलाउन कठिन रहेको जिल्ला प्रहरी कार्यालयले जनाएको छ । पहिरो खसेको ठाउँ उकालो र साँघु घुम्तीसँगै भएकोले जोखिम बढेको प्रहरीको भनाई छ ।