होन्डुरसको केन्द्रीय महिला कारागारमा झडपः ४१ जनाको ज्यान गयो

एजेन्सी– होन्डुरसको केन्द्रीय महिला कारागारमा झडप हुँदा ४१ जना कैदीको ज्यान गएको छ । लामो समयदेखि समस्यामा रहेको कारागारमा हिंसा भड्किएको रोयटर्सले जनाएको छ ।

हिंसामा धेरैजसोको जलेर ज्यान गएको र केहीलाई गोली लागेको होन्डुरसको सरकारी वकिलको कार्यालयका प्रवक्ता युरी मोराले बताएका छन् ।

हिंसा भड्किएको ठाउँमा अहिले खोजी भइरहेको र ज्यान गुमाउनेको संख्या अझै बढ्न सक्ने पनि उनले बताए ।

त्यही कारागारमा यस्तै घटना सन् २०१९ मा पनि भएको थियो । त्यसबेला ४० जनाको ज्यान गएको थियो । महिला कारागारमा पछिल्ला वर्षहरूमा हत्या–हिंसाका घटनाहरू बढेका छन् ।

दुई प्रतिद्वन्द्वी आपराधिक सङ्गठनका महिला गिरोह सदस्यहरू बीचको भिडन्तमा थुप्रै कैदीहरूलाई घाँटी थिचिएको छ भने कसैलाई छुरा प्रहार गरिएको छ ।

कारागारमा झण्डै आठ सय कैदीलाई राखिएको छ । जुन संख्या क्षमताको दोब्बर हो ।