मिना लामाको चलचित्र ‘चौबन्दी’ को च्यारिटी शो

काठमाडौं – लोकदोहोरी गायिका मिना लामाको चलचित्र ‘चौबन्दी’ को च्यारिटी शो गरिएको छ ।

शनिबार राजधानीमा आयोजित कार्यक्रममा उक्त चलचित्रको च्यारिटी शो सम्पन्न भएको हो ।

काठमाडौंस्थित बिजी मलको बिएसआर हलमा चलचित्रको शो गरिएको थियो । सो चलचित्र चौबन्दीको च्यारिटी शो कार्यक्रममा पूर्वमन्त्री दिलमान पाख्रिनको प्रमुख आतिथ्यता रहेको थियो । साथै, सो अवसरमा अन्य विभिन्न समाजसेवी तथा व्यक्तित्वहरु र चलचित्रसँग जोडिएका व्यक्तिहरुलाई सम्मान समेत गरिएको थियो ।

उक्त चलचित्र की निर्माता तथा नायिका समेत रहेकी मिना लामाको कथा रहेको छ भने निरेन श्रेष्ठले निर्देशन गरेका हुन् । चलचित्रमा स्व. कलाकार जयनन्द लामा, रश्मी भट्ट, मिना लामा, दिपाशा बिसी, ऋतु तामाङ लगायत अन्य कलाकारहरुको अभिनय रहेको छ ।

यस चलचित्रलाई रोयल मुभिज प्रालिले निर्माण गरेको हो । चलचित्र सामाजिक विषयवस्तुमा र आफ्नै जिवन कथामा आधारित रहेको निर्मात्री लामाले जानकारी दिइन् ।

साथै, उक्त चलचित्रलाई नेपालका हलहरुमा प्रदर्शन गर्ने सोंच तुरुन्तै नभएको र विदेशमा आफू जाने कार्यक्रममा कोसेलीका रुपमा लगेर प्रदर्शन गरिने उनको भनाइ छ ।