बार्सिलोना रियल सोसिडाडसँग २–१ ले पराजित

एजेन्सी –  बार्सिलोना घरेलु मैदानमा रियल सोसिडाडसँग २–१ ले पराजित भएको छ।

स्पोटिफाइ क्याम्प नोउमा शनिबार राति भएको खेलमा बार्सिलोनालाई हार चखाउन मिकेल मेरिनो र एलेक्सान्डर सोर्लोथले गोल गरे । घरेलु टोलीका रोबर्ट लेवान्डोस्कीले एक गोल फर्काए ।

खेलको पाँचौ मिनेटमा मिकेल मोरिनोको गोलबाट बार्सिलोना खेलमा १–० ले पछि पर्यो । उनले सोर्लाेथको पासमा गोल गर्न सफल भएका थिए ।

७१औं मिनेटमा सोर्लाेथले मार्टिन जुवीमेन्डीको पासमा गोल गर्दै रियल सोसिडाडलाई २–० ले अघि बढाए । त्यसपछि इन्ज्युरी समयमा लेवान्डोस्कीले फेरान टोरेसको पासमा गोल गर्दै खेललाई २–१ को स्थितिमा ल्याएपनि बार्सिलोनाको हार टरेन ।

च्याम्पियन बनेसँगै बार्सिलोनालाई खेल सकिएलगत्तै ट्रफी प्रदान गरिएको थियो । घरेलु मैदानमा हार भोगेपनि बार्सिलोनाले खुशीयाली मनाए ।

यस हारसँगै शीर्षस्थानमा रहेको बार्सिलोनाको ३५ खेलबाट ८५ अंक छ । बार्सिलोनाले दोस्रो स्थानको रियल म्याड्रिडलाई १४ अंकले पछि पारेको छ ।

बार्सिलोनालाई हराएको रियल सोसिडाडले शीर्ष चारमा रहँदै अर्काे सिजनको च्याम्पियन्स लिग खेल्ने सम्भावना बनाएको छ । सोसिडाड ३५ खेलबाट ६५ अंक जोडेर चौथो स्थानमा छ ।