चलचित्र ‘नीरफूल’ को ट्रेलर सार्वजनिक

काठमाडौं– चलचित्र ‘नीरफूल’ को ट्रेलर सार्वजनिक भएको छ ।

आगामी जेठ २६ गतेबाट देशभर रिलिज हुन लागेको उक्त चलचित्रको शुक्रबार ट्रेलर सार्वजनिक गरिएको हो ।

२०७२ सालको भूकम्पको कथावस्तुमा आधारित रहेर चलचित्र निर्माण भएको छ । भुकम्प र यसले दिएको पारिवारिक पीडालाई ट्रेलरमा उतारिएको छ । सार्वजनिक ट्रेलरमा भूकम्पपछि धादिङको रुबी भ्यालीबाट उद्धार गरेर काठमाडौं ल्याइएकी छोरीको खोजीमा निस्कने एक दम्पत्तीको संघर्ष प्रस्तुत छ ।

फूलमान वलको लेखक तथा निर्देशनमा बनेको यस चलचित्रमा दयाहाङ राई, बुद्धि तामाङ, शान्ति वाइबा, जिग्मे छ्योकी लगायतको अभिनय रहेको छ । त्यसैगरी, अभिनेत्री रेखा थापाको पनि चलचित्रमा विशेष भूमिका रहेको छ ।

नेपाल–म्यानमार फ्रेन्डसिप काउन्सिलसँगको सहकार्यमा सेलो प्रोडक्सनले निर्माण गरेको यस चलचित्रमा प्रमोद कार्कीको छायांकन रहेको छ भने निमेष श्रेष्ठको सम्पादन, अर्जुन पोखरेल र चन्द्रकुमार दोङको संगीत रहेको छ ।

धादिङको रुबी भ्याली, रसुवाको स्याफ्रुबेंसी र काठमाडौंमा छायांकन गरिएको चलचित्रको कोभिड–१९ को कारण रिलिज रोकिएको थियो ।