देउवा र नेपालबीच भेट : सभामुखबारे छलफल

काठमाडौं – नेपाली कांग्रेसका सभापति शेरबहादुर देउवा र नेकपा एकीकृत समाजवादीका अध्यक्ष माधवकुमार नेपालबीच भेटवार्ता भएको छ।

आज (बुधबार) बिहान अध्यक्ष नेपाल देउवालाई भेट्न धुम्बाराहीमा पुगेका हुन्। भेटमा सभामुख निर्वाचनबारे छलफल गरिएको बुझिएको छ । कांग्रेस र एकीकृत समाजवादीले प्रधामन्त्री पुष्पकमल दाहाललाई विश्वासको मत दिएपनि सरकारमा सहभागी भएको छैन। कांग्रेसले नयाँ सत्ता समीकरणबाट जनता समाजवादी पार्टी नेपाल, नागरिक उन्मुक्ति, जनमत पार्टीलगायतलाई आफूतिर तान्न खोजिरहेको छ। सभामुख र राष्ट्रपति निर्वाचनलाई लक्षित गरेर कांग्रेसले आफ्नो गठबन्धन बनाउन लागेको पनि बुझिएको छ ।

मंगलबारको सर्वदलीय बैठकमा प्रधानमन्त्री प्रचण्डले राष्ट्रपति र सभामुखको निर्वाचनमा पनि मिलेर जान प्रस्ताव गरेका थिए । बैठकमा राष्ट्रपति, सभामुख, उपराष्ट्रपति र उपसभामुखको विषयमा समेत छलफल भएको थियो। तर निष्कर्ष भने निक्लिएको थिएन।

प्रतिनिधि सभाको सभामुखका लागि आज मनोनयन दर्ता हुँदैछ। आज दिउँसो १ बजेदेखि ४ बजेसम्म उम्मेदवारले मनोनयन दर्ता गरिसक्नु पर्ने संघीय संसद सचिवालयले सार्वजनिक गरेको कार्यतालिकामा उल्लेख छ। नेपालसँगको सभामुख उम्मेदवारबारे छलफलपछि कांग्रेसको पदाधिकारी बैठक बसेको हो। बैठकमा सभामुख र समसामयिक राजनीनिबारे छलफल गरिरहेको छ।