टीकाको दिनसम्म बा झापामै रहने भएपछी एमालेमा दशैंअघि टिकट वितरणको सम्भावना टर्र्यो

काठमाडौं – दशैंअघीनै टुङ्ग्याईने भनिएको नेकपा एमालेको टिकट वितरण टीकापछि मात्रै हुने भएको छ ।

पार्टी अध्यक्ष ‘बा’ अर्थात् केपी शर्मा ओली टीकाको दिनसम्म गृह जिल्ला झापा रहने कार्यक्रम रहेकाले दशैंअघि टिकट वितरणको सम्भावना टरेको हो । ओली सोमबार बिहान ११ बजे झापा जाँदैछन् । ‘दशैंको अघिल्लो दिन सधैं अध्यक्ष कमरेडले झापामा बृहत चियापान राख्ने गर्नुभएको छ’, प्रचार विभाग उपप्रमुख विष्णु रिजालले भने ।

ओलीका पिता झापा नै भएकाले टीका लगाएर मात्रै काठमाडौं फर्कने कार्यक्रम रहेको रिजालले बताए । ‘अरु नेताहरू पनि दशैं मनाउन गृह जिल्ला पुग्नु भएको छ’, रिजालले भने, ‘महासचिव शंकर पोखरेल दाङ पुग्नुभएको छ भने उपाध्यक्ष विष्णुप्रसाद पौडेल बुटवल हुनुहुन्छ ।’ अध्यक्षसहित नेताहरु नै गृह जिल्लातिर लाग्ने कार्यक्रम भएकाले दशैंको टीका पछि मात्रै टिकट वितरणबारे निर्णय हुने उनले बताए ।

गएको बिहीबार बसेको सचिवालय बैठकले टिकट तिवरण गर्ने अधिकारी अध्यक्ष ओलीलाई दिएको छ । तर आवश्यक परामर्श अन्य नेताहरुबाट पनि लिने निर्णय भएकाले दशैं अगाडि टिकट वितरणको सम्भावना नरहेको नेताहरू बताउँछन् ।