स्थानीय तहनिर्वाचनमा एक करोड ७७ लाख बढी मतदाता

काठमाण्डौ – आगामी बैशाख ३० गते हुने स्थानिय तह निर्वाचनमा कुल १ करोड ७७ लाख बढी मतदाता कायम भएको निर्वाचन आयोगले जनाएको छ ।

निर्वाचनका लागी मतदाता नामावली माथिको दावी विरोधपछि कुल १ करोड ७७ लाख ३३ हजार ७ सय २३ कायम भएको एक आयुक्तले जानकारी दिए । आयोगले आगामी स्थानीय तह निर्वाचनका लागि अन्तिम मतदाता नामावली प्रकाशन गर्नेसमेत निर्णय गरेको उनले जनाए ।

आयोगका अनुसार ८९ लाख ९२ हजार १० पुरुष, ८७ लाख ४१ हजार ५ सय ३० महिला, र अन्य १ सय ८३ मतदाता रहेका छन् । यसअघि भएको २०७४ सालको निर्वाचनपछि हालसम्म ३६ लाख हाराहारी मतदाता संख्या बढेको छ । पाँच बर्षको अवधीमा ३६ लाख ५९ हजार दुई सय ९९ मतदाता बढेको हो । पाँच वर्षअघि १ करोड ४० लाख ७४ हजार चार सय २४ मतदाता कायम थियो ।

अन्तिम मतदाता विवरण आयोगको वेवसाइट मार्फत सार्वजनिक गर्ने तयारी गरेको छ । आयोगले यसअघि मतदाता नामावलीमाथि दावी विरोधका लागि प्रत्येक जिल्ला निर्वाचन कार्यालय तथा स्थानीय तहमा मतदाताको सूची टाँस गरेको थियो । आयोगको निर्वाचन कार्यतालिका अनुसार आगामी स्थानीय तह निर्वाचनका लागि  बैशाख ११ देखि १२ गतेसम्म उमेदवार मनोनयन पत्र दर्ता गर्ने, बैशाख १२ गते नै साँझ ५ बजेदेखि ६ बजेसम्म उमेदवारको सूची प्रकाशन गर्ने, बैशाख १३ गते बिहान १० बजेदेखि ५ बजेसम्म उमेदवारमाथिको दावी विरोधको समय तोकिएको छ ।

यस्तै बैशाख १४ देखि १५ गतेसम्म मनोनयन पत्र जाँच गर्ने, बैशाख १५ गते उमेदवारको नामावली प्रकाशन गर्ने,  बैशाख १६ गते उमेदवारले नाम फिर्ता लिने र १६ गते नै उम्मेदवारी अन्तिम नामावली प्रकाशन गर्ने कार्यतालिका रहेको छ । यस्तै बैशाख १७ गते उम्मेदवारलाई चुनाव चिन्ह दिने बैशाख ३० गते बिहान ७ बजेदेखि साँझ ५ बजेसम्म मतदान गर्ने कार्यतालिका रहेको छ ।