जनस्वास्थ्य अधिकृतद्धारा श्रीमतीलाई करारमा भर्ती : काम नगरीकनै तलवसुबिधा प्रदान

कञ्चनपुर – जिल्ला स्वास्थ्य कार्यालय कञ्चनपुरका प्रमुख, बरिष्ठ जनस्वास्थ्य अधिकृत शिबराज सुनारले आफ्नै श्रीमतीलाई करारको जागिर खुवाएर काम नगरीकनै सेवा सुविधा दिलाउने गरेको पाईएको छ।

स्वास्थ्य कार्यालयले गत आर्थिक वर्ष ९ माघ ०७७/७८ मा करारका विभिन्न पदमा आठजना कर्मचारी भर्नाका लागि आह्वान गरेको विज्ञापनअनुरूप कार्यालय प्रमुख सुनारले सेटिङमा गैरकानुनी ढंगले आफ्नै श्रीमतीलाई जागिर खुवाँउदै आएकोको खुलेको हो।

प्रमुख बरिष्ठ जनस्वास्थ्य अधिकृत शिबराजले आत्महत्या रोकथाम तथा विद्यालयमा मानसिक स्वास्थ्य कार्यक्रमका लागि उनले आफ्नी श्रीमती रेखाकुमारी सुनारलाई भर्ना गरेको पाइएको छ। आत्महत्या रोकथाम तथा विद्यालयमा मानसिक स्वास्थ्य कार्यक्रमका लागि अन्य १२ जनाले दरखास्त दिएका थिए। प्राविधिक शिक्षा पढेका, तर बेरोजगारलाई लत्याउँदै कार्यालय प्रमुखले श्रीमतीलाई जागिर दिएपछि उनको नैतिकतामाथि अन्य कर्मचारीले प्रश्न गरेका छन्।

स्वास्थ्य कार्यालयका कर्मचारीहरू जोकसैकी श्रीमती वा आफन्तले सरकारी जागिर खान नपाउने हुँदैन, तर आफैँ कार्यालय प्रमुख हुँदा श्रीमतीलाई जागिर दिने काम नैतिकताको प्रश्न भएको बताउँछन्। समाजमा बढ्दै गएको आत्महत्या कार्यक्रम रोकथामका लागि सरकारले ल्याएको उक्त कार्यक्रमअन्तर्गत करारमा कर्मचारी भर्नाका लागि आह्वान गरेअनुरूप प्रमुखले शक्तिका भरमा एकातिर श्रीमतीलाई कर्मचारी त बनाए अर्कोतिर काममा नलगाईकनै सरकारी राज्य कोषको ढुकुटी सिध्याउने काम गरेको भन्दै केही कर्मचारी असन्तुष्ट भएका छन्।

‘यहाँ हामीले कोरोना महामारीका वेला मरीमरी काम गर्नुपर्छ, तर कार्यालय प्रमुखले आफ्नी श्रीमतीलाई काममा नलगाईकनै सरकारी तलब खुवाएका छन्,’ ती कर्मचारीले भने, ‘व्यक्ति शक्तिमा कति भोगी – लोभी अधिकारको दुरुपयोग गर्दछन् भन्ने उदाहरण प्रस्ट भएको छ।’ कार्यालय प्रमुख सुनारले श्रीमती रेखालाई भर्ना गरेर शुक्लाफाँटा कार्यक्षेत्र हालेका थिए। तर, कहिल्यै कार्यक्षेत्र नगएको जनस्वास्थ्य कार्यालयले जनाएको छ। सो नगरका विद्यालयमा गरिने तालिम पनि जनस्वास्थ्य कार्यालयमा गर्ने गरिएको र कार्यालयमै हाजिर लगाएर तलब खाने गरेको कार्यालय स्रोतको दाबी छ।

अघिल्लो आर्थिक वर्ष ०७६ ७७ मा स्वास्थ्य कार्यालयबाट सञ्चालित परिवार नियोजन सेवाका लागि भिजिटर प्रोभाइडर पदमा समेत कार्यालय प्रमुख सुनारले श्रीमतीको प्रमाण अपुग हुँदा पनि जागिर खुवाएको पाइन्छ। भिजिटर प्रोभाइडर पदका लागि आइयुसिटी इमप्लान्ट कार्यक्रम तालिम लिएको हुनुपर्ने भए पनि कार्यालय प्रमुख सुनारकी श्रीमतीसँग तालिम प्रमाण नहुँदासमेत अपुग प्रमाणले जागिर खुवाएको खुलेको छ।

२ चैत ०७६ मा कार्यालय प्रमुख सुनार आफैँले श्रीमती रेखाकुमारी सुनारलाई भिजिटर प्रोभाइडर पदमा नियुक्त गरेका थिए। असार मसान्त ०७७ मा उक्त पदको म्याद समाप्त भएको थियो। त्यसपछि ३१ असार ०७७ मा रेखाले म्याद थपका लागि आवेदन दिएकी थिइन्। रेखाको आवेदनअनुरूप कार्यालय प्रमुख सुनार आफैँले हस्ताक्षर गरेर १५ भदौ ०७७ मा म्याद थपको पत्र बनाएका थिए। १ साउन देखि ०७७ कात्तिक मसान्तसम्मका लागि म्याद थप भएको थियो।

स्वास्थ्य कार्यालय कञ्चनपुरका सूचना अधिकारी गौरसिंह कार्कीले करारमा भर्ना भएका सबै कर्मचारी कानुनअनुरूप भर्ना गरिएको बताए। सूचना अधिकारी कार्कीले प्रमुखकी श्रीमतीको अन्तर्वार्ता हुँदा उनी अन्तर्वार्तामा नबसेको बताए। ‘पदपूर्ति गर्दा लोकसेवा, प्रशासन, अस्पतालबाट प्रतिनिधि आएर गरेका हुन्,’ उनले भने, ‘कसको कता सेटिङ मलाई थाहा छैन, तर कर्मचारी भर्ना प्रक्रियाअनुरूप भएको छ।’ उनले कार्यालय प्रमुख वा अन्य कसैकी श्रीमती वा नाता पर्ने योग्यता पुगेको भए भर्ना हुन पाउने हो, काम नगरीकनै तलब खान नमिल्ने बताए।

स्वास्थ्य कार्यालय कञ्चनपुरका प्रमुख शिवराज सुनारले कानुनअनुरूप नै कर्मचारी भर्ना गरिएको बताए। उनले केही सामाजिक सञ्जाल र अनलाइन मिडियामा आएजस्तो पूरै विषय सत्य नभएको बताए। अनि काम नगरीकनै तलब खुवाउने विषयसमेत सत्य नभएको बताउँदै उनले नाताले श्रीमती पर्ने भएकाले प्रश्न उठाएको बताए।

भ्रमण, क्यान्टिन र खोप दुरुपयोगजस्ता विषय भ्रामक भएको बताउँदै उनले दुखेसो पोखे। ‘म सुत्केरी बिदामा हुँदा पनि काम गरेको छु,’ उनले भने, ‘कोरोना रोकथामका लागि मेरो भूमिका कसैले बुझिदिएन, यो दुःखद विषय हो।’ काम गर्दै जाँदा कतै ढंग नपुगेको बताउँदै उनले सबै कानुनअनुरूप भएको दाबी गरेका छन्।