नक्कली लालपूर्जा बनाएर १९ करोड ठगी : कुमारी बैंकका ४ कर्मचारी पक्राउ

काठमाण्डौ – सरकारी लिखत कीर्ते सम्बन्धी कसूरमा अनुसन्धानका लागि केन्द्रीय अनुसन्धान ब्यूरो (सीआईबी)ले केही साता अघि ५ जनालाई पक्राउ गरेको छ ।

गायक यागेश्वर अमात्यको जग्गाको नक्कली धनी पूर्जा बनाएर ऋण प्रवाह भएको भेटिएको हो । अमात्यको बारामा रहेको १२ विगाहा जग्गा धितो राखेर कुमारी बैंकको बारा शाखाबाट १९ करोड रुपैयाँ ऋण प्रवाह भएको पाइएको हो ।यसबारे जानकारी पाएपछि अमात्यले दशैं अघि प्रहरीको केन्द्रीय अनुसन्धान ब्यूरो (सीआईबी) मा अनुसन्धानका लागि जाहेरी दिएका थिए । बैंककै कर्मचारीको मिलेमतोमा कतिसम्मको ठगी धन्दा चल्दोरहेछ भन्ने पछिल्लो उदाहरण हो, यो चाहीँ । चर्चित गायकको नामको जग्गाको नक्कली लालपूर्जा बनाएर १९ करोडको कर्जा दिने बैंक हो, कुमारी बैंक ।

त्यसरी ठगी धन्दा चलाउने व्यक्ति को होला ? ठगी धन्दा चलाउने व्यक्ति पनि बैंककै कर्मचारी ! गायक योगेश्वर अमात्यले प्रहरीमा उजुरी हालेपछि बैंकका कर्मचारीसहित चार जना पक्राउ परेका छन्। पक्राउ पर्नेमा कुमारी बैंक पर्सा शाखाका जुनियर असिस्टेन्ट सोनु ठाकुर, जग्गाका मूल्यांकनकर्ता राजेश्वर चौरसिया, मुक्तिनाथ गौतम र एसकुमार महर्जन छन्।

केन्द्रीय अनुसन्धान ब्युरो (सीआईबी) को घेरामा रहेका उनीहरुमध्ये तीन जनालाई केही दिनअघि काठमाडौंबाट पक्राउ गरिएको थियो भने चौरसियालाई मंगलबार पक्राउ गरिएको छ ।सीआईबीका अनुसार गायक अमात्यको बारामा रहेको १२ बिगाहा जग्गाको कीर्ते कागजात बनाएर १९ करोड ठगी गरेको पाइएको छ ।

कुमारी बैंक पर्सा शाखाका जुनियर असिस्टेन्ट ठाकुरसहितको मिलेमतोमा ठगी धन्दा भएको फेला परेको छ । गौतम र महर्जनले बिरुवा भूमि वनकाली कम्पनीका नाममा नक्कली कागजात बनाएर कुमारी बैंकबाट १९ करोड निकालिएको प्रमाण भेटिएको छ । जग्गाको नक्कली लालपूर्जा बनाएर बैंकको न्यूरोड शाखाबाट रकम निकालेको पत्ता लागेपछि उनीहरुलाई प्रहरीले पक्राउ गरेको थियो ।

नक्कली कागजात बनाउन सफल भएपछि ऋण स्वीकृत गर्न कुमारी बैंकको केन्द्रीय कार्यालय नक्सालमा पत्राचार गरिएको भेटिएको छ भने केन्द्रीय बैंकले पनि सजिलै ऋण स्वीकृत गरिदिएको पनि अनुसन्धानमा प्रमाण फेला पारिएको छ ।आफूलाई थाहै नपाई भित्रभित्रै यस्तो ठगी धन्दा चलेको थाहा पाएपछि गायक अमात्यले आफ्नो जग्गा कीर्ते गरेर ऋण निकालेको भन्दै एक महिनाअघि प्रहरीमा उजुरी दिएका थिए ।

त्यसपछि सीआईबीले यसबारे अनुसन्धान सुरू गरेको थियो। प्रहरीसँगको बयानमा नक्कली जग्गा धनी महर्जन र गौतमले आफूहरु पनि फसेको बताएका छन् । उनीहरुले ‘प्रधानले आफूहरुलाई डुबाएको’ बताएका छन् ।