ओलीसँग सम्बन्ध बढाँउदै प्रधानमन्त्री देउवा :

१३ असोज,काठमाण्डौ – प्रधानमन्त्री शेरबहादुर देउवाले नेकपा एमालेका अध्यक्ष केपी शर्मा ओलीसंगको सम्बन्धलाई बढाँउदै लगेका छन् ।

पछिल्लो समय एमसिसि पारित लगायतका विषयमा ओलीसंग छलफल गर्दै आएका प्रधानमन्त्री देउवाले मंगलवार साँझपनि आफ्ना विश्वासपात्र मानिएका कानुन मन्त्री ज्ञानेन्द्रबहादुर कार्कीलाई ओली निवास बालकोट पठाएका हुन् । कानुन मन्त्री कार्कीलाई एमसिसि पारितकै बिषयमा छलफल गर्न बालकोट पठाईएको श्रोतले बताएको छ ।

यसअघी पनि प्रधानमन्त्री देउवाले कानुन मन्त्री कार्कीलाई ओलीकहाँ दुईपटक पठाइसकेका छन् । त्यस्तै हिजो मंगलबार साँझ पनि ओलीसँग सम्बन्ध सुधारको सन्देश लिएर कार्की बालकोट पुगेका थिए । राजनीतिक दलसम्बन्धी अध्यादेश खारेज गरेको भोलिपल्ट बिहानै कार्की प्रधानमन्त्री देउवाको सम्बन्ध सुधारको सन्देश लिएर बालकोट पुगेका हुन् ।

‘सम्बन्ध सुधार गरौँ, अब मिलेर अघि बढ्नुपर्छ भन्ने प्रधानमन्त्रीको सन्देश लिएर आउनुभएको रहेछ,’ ओली निकट स्रोतले भन्यो, ‘के विषयमा सम्बन्ध बिग्रेको हो भन्नेबारेमा तपाईंहरुलाई पनि जानकारी छ ।’ देउवा र ओलीबीच सरकारले ल्याएको अध्यादेश, नेकपा एमाले विभाजन गराउन प्रधानमन्त्री र सभामुखले षडयन्त्र गरेकोलगायतका विषयमा विवाद बढ्दो छ । तर कतिपयले भने ओली र देउवाको सम्बन्ध नजिकिदो कारण अर्कै रहेको बताउँछन् ।

एकजना नेकपा एमालेका नेताले अनौपचारिक कुराकानीमा ‘अर्ली इलेक्सन या संसद् विघटन नै अबको बाटो भएको बताए । उनका अनुसार यो संसद्प्रति ओलीको विश्वास छैन । ओलीलाई विश्वासमा लिएर चुनावी सरकार गठन गरेर निर्वाचनमा जानु नै देउवाको रणनीति हुन सक्छ । त्यसैले उनी मन्त्रिपरिषद् विस्तारदेखि सचिवालयसम्म बनाउन ध्यान दिएका छैनन् । राजनीतिक विश्लेषक पुरञ्जन आचार्य पनि सम्बन्ध सुधारमा केही स्वार्थ रहेको तर्क गर्छन् ।

‘उहाँहरुको सम्बन्ध नबिग्रिँदा नै सत्ता हस्तानान्तरण भएको हो । सम्बन्ध सुमधुर हुनु नराम्रो होइन । तर एकातिर गठबन्धनले सरकार दिन सकिरहेको छैन । अर्कोतिर एमसीसी तरवारजस्तो मच्चिरहेको छ । यो पास गर्नुपर्ने वाध्यता देखिएको छ । गठबन्धनले एमसीसी पास गर्न हच्किरहेको छ भने एमाले अध्यक्ष केपी शर्मा ओलीको चाहना यो पास होस् भन्ने छ,’ आचार्यको तर्क छ, ‘भोलिका सम्भावनासहित संसद् चलाउन सहज होस् भनेर पनि सम्बन्ध सुधारको प्रयास गरिएको हुन सक्छ । कांग्रेस महाधिवेशनसँग पनि केही न केही स्वार्थहरु जोडिएका छन् ।’
गठबन्धनमा जति तिक्तता बढ्छ त्यति नै देउवा र ओलीको सम्बन्ध सुधार हुने उनको तर्क छ । ‘नियुक्तिहरुमा ट्याकटुक पारेर प्रधानमन्त्री आफैँले गरिरहनुभएको छ त्यसले अर्कोतिर दिक्दारी बढाएको छ,’ उनले भने, ‘गठबन्धनमा जति तिक्तता बढ्छ त्यति नै सम्बन्ध ओलीसँग बढ्ने हो । शेरबहादुर देउवाको पनि ओलीको पनि उद्देश्य त चुनावमा जाने थियो । चुनावी सरकारका लागि देउवा र ओलीको गठबन्धन हुने सम्भावना बढ्दै गएको म चाहिँ देख्छु । यसमा कांग्रेस अधिवेशनले कति प्रभाव पार्छ भन्न सकिँदैन तर दुवैजना जान चाहेको बाटो भनेको चाहिँ चुनाव नै हो ।’

तर कांग्रेस सहमहामन्त्री डा. प्रकाशशरण महत भने मन्त्रीलाई प्रधानमन्त्रीले अनेक काम लगाउन सक्ने बताउँछन् । प्रतिपक्षलाई विश्वासमा लिनु सत्तापक्षको कर्तव्य नै भएकाले यसलाई अन्यथा लिन नहुने उनको तर्क छ । ‘नेकपा एमालेका अध्यक्ष केपी शर्मा ओलीसँग के कुरा गर्ने भन्ने विषयमा पार्टीमा छलफल भएको छैन,’ डा. महतले भने, ‘प्रधानमन्त्रीले मन्त्रीलाई अनेक काम लगाउन सक्नुहुन्छ । प्रतिपक्षलाई विश्वासमा लिनु सरकारको कर्तव्य पनि हो । त्यसका लागि कुराकानी हुन स्वाभाविक हो ।’