माइतीघर र रत्नपार्कमा सभा-सम्मेलनमा राेक लगाउने तयारी

१ भदौ,काठमाण्डौ – काठमाण्डौ  महानगरपालिकाका प्रमुख विद्यासुन्दर शाक्यले खुलामञ्चलाई खुला नै राख्ने महानगरको अडानले मूर्तरुप प्राप्त गरेको बताएका छन् ।

महानगरपालिकाको ६८औँ कार्यपालिका बैठकलाई सम्वोधन गर्दै शाक्यले यस्तो बताएका हुन् । ‘राष्ट्रिय महत्वको संरचना दरबार हाइस्कुल र वीर अस्पतालको पुनर्निर्माणको क्रममा त्यहाँ प्रयोग हुने निर्माण सामग्रीहरु र त्यहाँ काम गर्ने केही कामदारलाई राख्नका लागि उनीहरुकै आग्रहमा काठमाडौँ महानगरले सहमति दिएको थियो,’ प्रमुख शाक्यले भने, ‘वीर अस्पताल र दरबार हाईस्कुलको पुनर्निर्माण सम्पन्न भएसँगै खुलामञ्चलाई खुला गर्ने हाम्रो अडानले पुर्णता प्राप्त गरेको छ। पछिल्लो समय बसपार्क पनि त्यहाँबाट हटाएर खुलामञ्चलाई पूर्णरुपमा खुला गरेका छौँ ।’

शाक्यले आम नागरिक, राजनीतिक दल र विभिन्न समूहका अभिव्यक्ति स्वतन्त्रताका लागि सार्वजनिक स्थानहरु उपलब्ध हुनुपर्छ भन्ने हेतूले खुलामञ्चलाई खुला नै छाड्ने महानगरको नीतिलाई निरन्तरता दिएको स्मरण गराए । ‘विभिन्न राजनीतिक दल र सर्वसाधारणले आफ्ना आवाज र माग सम्वोधनका लागि सडकमा सभा–सम्मेलन, धर्ना, जुलुस गर्दा ट्राफिक जाम भई आवतजावतनै अस्तव्यस्त भई थप भिडभाड बढ्ने र अन्तराष्ट्रिय यात्रुहरुलाई समेत ओहोरदोहोरमा कठिनाई हुने भएकाले हामीले खुलामञ्चलाई व्यवस्थापन गर्न खोजेका हौँ,’ शाक्यले भने, ‘खुलामञ्च व्यवस्थापनसँगै माइघीघर, बानेश्वर, दरवारमार्ग, रत्नपार्क लगायतका स्थानमा सभा–सम्मेलन, धर्ना, जुलुस गर्न नपाउने समेत व्यवस्था गर्न चाहेका छौँ।’

विभिन्न राजनीतिक दलले सडकमै मञ्च बनाई सभा गर्दा महानगरका क्षेत्र भित्रको व्यापार–व्यवसाय समेत अस्तव्यस्त बन्ने गरेको भन्दै शाक्यले प्राचीन कालदेखि काठमाडौँको खुला स्थलको पहिचान बनाएको खुलामञ्चलाई खुला राख्दै थप व्यवस्थापन गर्ने कार्यमा महानगर प्रतिवद्ध रहेको पनि जानकारी दिए। ‘खुलामञ्चलाई सार्वजनिक कार्यक्रमको लागि एउटा प्रभावकारीस्थलको रूपमा विकास गर्ने योजनामा हामी छौँ,’ शाक्यले भने।

शाक्यले खुलामञ्च थप व्यवस्थापनका लागि सरकारसँग पहल गरिरहेको पनि जानकारी गराए। ‘सम्माननीय प्रधानमन्त्री केपी शर्मा ओली नेतृत्वको सरकारका पालामा प्रधानमन्त्रीज्युसँग पटक–पटक रानीपोखरीदेखि खुलामञ्चसम्मलाई व्यवस्थापन गर्न हामीले तयार पारेको गुरुयोजनाबारे छलफल गरेका थियौँ,’ शाक्यले भने, ‘हामीले तयार पारेको गुरुयोजनाबारे राष्ट्रिय पुनर्निमाण प्राधिकरणसँग पनि पटक–पटक छलफल गरेका छौँ। त्यसैले खुला मञ्चलाई खुला नै राख्नुपर्छ भन्ने हाम्रो अभियान अहिले पनि जारी छ।’

पछिल्लो समय अर्थात धरहरा उद्घाटनका बेला प्राधिकरणले लैनचौरदेखि केशरमहल, नारायणहिटी दरबारदेखि जमल हुँदै रानीपोखरीसम्म, रानीपोखरीदेखि टुँडिखेल हुँदै दशरथ रंगशालासम्मको क्षेत्रलाई खुला क्षेत्रको रूपमा व्यवस्थित गर्ने ग्रेटर टुँडिखेल गुरुयोजना अघि सारेको पनि स्मरण गराए।

शाक्यले नेपाल सरकार, प्रदेश सरकार, उपत्यका भित्रका पालिका र सवारी साधान व्यवसायीको समन्वय, सहकार्य र लागत सहभागितामा सवारी साधानको कार्य प्रकृति तथा सञ्चालन हुने दूरीका आधारमा लामो दूरी र सहरी यातायातका छुट्टछुट्टै सवारी साधान टर्मिनलको विकास गर्न महानगरले पहल गर्ने पनि प्रतिवद्धता व्यक्त गरे। शाक्यले काठमाडौँ महानगर सार्वजनिक जग्गाको संरक्षण अभियानमा लागि परेको समेत स्मरण गराए। ‘खुलामञ्च मात्रै होइन महानगर क्षेत्र भित्रका अतिक्रमित सार्वजनिक जग्गालाई महानगरले खोजी गरी पार्क बनाउने, खुला राख्ने जस्ता अभियान चलाएको छ।