छिमेकी दम्पतीलाई मरणासन्न हुनेगरी कुट्ने छिमेकी पक्राउ

२३ साउन,काठमाण्डौ – राजधानीको कीर्तिपुरमा छिमेकी दम्पतीलाई मरणासन्न हुनेगरी कुट्ने छिमेकी पक्राउ परेका छन् ।

गत बिहिबार, कीर्तिपुर नगरपालिका – ५ स्थित भत्केको पाटीमा भुकम्पले चर्केको पर्खाल बनाउँदा ‘आफुलाई नसोधेको र हो–हल्ला गरेको’ भन्दै स्थानीय राधेश्याम विष्टले छिमेकी ७० वर्षीय नेत्रप्रसाद खनाल र सरस्वती खनाललाई मरणासन्न हुनेगरी कुटेका थिए।

घटना लगत्तै पिडितका आफन्तले प्रहरीमा जाहेरी दिएपस्चात् कुटपिटमा संलग्न राधेश्याम विष्टलाई शुक्रवार पक्राउ गरिएको महानगरीय प्रहरी वृत कीर्तिपुरका डिएसपी ठाकुर प्रसाद पोखरेलले बताए । पोखरेलले भने – ‘पिडीतको जाहेरीका आधारमा अभद्र ब्यवहार मुद्दामा अनुसन्धान गरिरहेका छौं ।’

विष्टले गमलाले हिर्काउँदा नेत्रप्रसादको फिस्टुला फुटेको र मिर्गौला डायलासिस गर्न समस्या भएको छोरी सम्झना खनालले बताइन् । सम्झनाका अनुसार सरस्वतीको पनि टाउकोमा गम्भीर चोट लागेको छ ।

बिहीबार राति अबेरसम्म पर्खाल बनाउँदा ‘हल्ला भएको’ भन्दै विष्ट शुक्रवार विहान दम्पतीबिरुद्ध आक्रमणमा उत्रिएका थिए ।