रेडपाण्डाको छाला र भालुको पित्तसहित ३ जना पक्राउ

२७ असार,नेपालगन्ज – प्रहरीले संरक्षित रेडपाण्डाको छाला र भालुको पित्तसहित बाँकेबाट ३ जनालाई पक्राउ गरेको छ ।

शनिबार साँझ नेपालगन्ज उपमहानगरपालिका–१ पुष्पलाल चोकस्थित राप्ती गेस्ट हाउसको कोठा नम्बर १० बाट रेडपाण्डाको छाला १ थान र ४ वटा भालुको पित्तसहित ३ जनालाई प्रहरीले पक्राउ गरेको हो ।

पक्राउ पर्नेहरुमा दाङ घोराही उपमहानगरपालिका – ४ ठेगाना भएका ४९ वर्षीय भक्त बहादुर पुन, सोही ठाउँ ठेगाना भएका ४१ वर्षीय केशव पुन र दाङ शान्तीनगर गाउँपालिका – १ ठेगाना भएका २९ वर्षीय रोबिन बुढा रहेका छन् ।

संरक्षित वन्यजन्तुका अंगको कारोबार भइरहेको भन्ने सूचनाको आधारमा लुम्बिनी प्रदेश प्रहरी कार्यालय दाङ अनुसन्धान समूह र जिल्ला प्रहरी कार्यालय बाँकेबाट खटिएको प्रहरीले उनीहरुलाई उक्त गेष्टहाउसबाट नियन्त्रणमा लिएको हो । यससम्बन्धमा प्रहरीले थप अनुसन्धान गरिरहेको जनाएको छ ।