खोटाङमा छोराद्धारा खुकुरी प्रहार गरी आफ्नै बाबुको निर्मम हत्या

१३ असार,खोटाङ – खोटाङमा खुकुरी प्रहार गरी छोराले आफ्नै बाबुको निर्मम हत्या गरेका छन् ।

दिक्तेल रुपाकोट मझुवागढी नगरपालिका २ सोल्माका २८ बर्षीय सुबर्ण राईले खुकुरी प्रहार गरी आफ्नै बुबाको हत्या गरेका हुन् । आज आइतबार बिहान पौने ५ बजे उनले ७२ बर्षीय बाबु चन्द्रबहादुर राईलाई गर्धनमा खुकुरी प्रहार गरेका थिए । खुकुरी प्रहारबाट बाबुको गर्धननै छिनेको थियो ।

बाबु मार्ने छोरालाई प्रहरीले सोही वडाको अल्छेढुंगाबाट पक्राउ गरेको छ । हत्या गरेको सूचना प्राप्त हुनासाथ जिल्ला प्रहरी कार्यालय खोटाङबाट प्रहरी टोली खटिएको थियो । राईले आफ्नै बाबुको गर्धनमा खुकुरी प्रहार गर्नु पर्ने कारण खुलेको छैन ।

घटना सम्बन्धमा थप अनुसन्धान भइरहेको प्रहरीले जनाएको छ ।