रौतहटमा खेतमा पानी लगाउने विषयमा झडप : १५ जना घाइते

१२ असार,रौतहट – रौतहटमा खेतमा पानी लगाउने विषयमा झडप हुँदा १५ जना घाइते भएका छन् ।

शनिबार बिहान,  मौलापुर नगरपालिका – १ स्थित मर्यादपुरमा खेतमा पानी लगाउने विषयमा भएको दूई समुहवीचको झडपमा १५ जना घाइते भएका हुन् ।

मौलापुरको मर्यादपुरमा मुलावी साहले हृदय यादवको खेतमा पानी लगाइदिएपछि विवाद हुँदा भएको झडपमा दुवै पक्षका गरी १५ जना घाइते भएको जिल्ला प्रहरी कार्यालय रौतहटका एसपी सिद्धिविक्रम शाहले जानकारी दिए । एसपी शाहका अनुसार साह पक्षका ८ जना र यादव पक्षका ७ जना घाइते भएका छन् ।

उनीहरुको मौलापुरमै उपचार भइरहेको र सबै खतरामुक्त रहेको एसपी शाहले बताए । ‘घटनामा संलग्न सबै घाइते भएका छन् । अहिले सबैको अवस्था खतरामुक्त छ, उपचार भैरहेको छ,’ एसपी शाहले भने ।

दोहोरो झडपका कारण केही समय मर्यादपुर क्षेत्र तनावग्रस्त बनेको थियो । घटनास्थलमा थप सुरक्षाकर्मी खटाइएपछी अहिले अवस्था सामान्य भैसकेको एसपी शाहले बताए ।