सर्लाहीमा डोजरको बकेट प्रहार गरी वडाध्यक्षको क्रुर हत्या : अपरेटरसहित दुईजना पक्राउ

१२ असार,सर्लाही – सर्लाहीमा डोजरको बकेट प्रहारबाट वडाध्यक्षको हत्या भएको छ ।

शुक्रबार साँझ, सर्लाहीको ईश्वरपुर नगरपालिका वडा नं. ३ का अध्यक्ष सूर्यकुमार श्रेष्ठको डोजरको बकेटले हिर्काएर हत्या भएको हो ।

सामान्य विवादमा डोजर चालक हर्षबहादुर तामाङले बकेट प्रहार गरी वडाध्यक्ष श्रेष्ठको हत्या गरेको सर्लाही प्रहरीका एसपी सन्तोषसिंह राठोरले जानकारी दिए । एसपी राठोरका अनुसार चालक तामाङसहित दुई जनालाई पक्राउ गरी अनुसन्धान भइरहेको छ ।

सर्लाहीको इश्वरपुर नगरपालिका ३ मा सार्वजनिक पोखरी खनिदैछ । सोहि पोखरीको अनुगमनका क्रममा त्यहाँ पुगेका वडाध्यक्ष श्रेष्ठ, ठेकेदार र चालक एकैठाउँमा बसेर खानपिनसमेत गरेको खुल्न आएको छ ।

खानपिनकै क्रममा विवाद भएर चालकले डोजर स्टार्ट गरी बकेटले वडाध्यक्षको टाउकोमा प्रहार गरि हत्या गरेपछि खाल्डोमासमेत हालेका थिए ।