२०८२ बैशाख २३, मंगलबार

सप्तरीमा मेयरका काकाद्धारा नगरपालिकाका प्राबिधिकमाथी कुटपिट

शुभयुग संवाददाताप्रकाशित मिति: २०७८ अषाढ १२, शनिबार (३ साल अघि)

१३८० पाठक संख्या

१२ असार,सप्तरी – सप्तरीको खडक नगरपालिकाका मेयर हेमायु हकका काका अबुल हुसैनले नगरपालिकाका सब – इन्जिनियर विश्वप्रताप झामाथि कुटपिट गरेका छन् ।

नगरपालिकाको वडा नम्बर ८ मा माटो र ग्राभेलको काम गर्न गठन भएको उपभोक्ता समितिका सदस्यसमेत रहेका मेयरका काका नाता पर्ने अबुल हुसैनले कामै नगरी मूल्यांकन गराउन खोजेका थिए । तर सब इन्जिनियर झाले त्यसो गर्न नमिल्ने बताएपछी उनिमाथी कुटपिट गरेका हुन् ।

सब इन्जिनियर झाले रु ३ लाख बजेटको माटो र ग्राभेलको काम स्टिमेट अनुसार नगरी बलजफ्ती मूल्यांकन गर्न भन्दा आफूले नमानेको बताए । मूल्यांकन गर्न नमान्दा हुसैनले आफूलाई कुटपिट गरेको उनले बताए । ‘म आफ्नो कोठामा बसिरहेको थिएँ’ झा भन्छन्, ‘एक्कासी आएका हुसैनले मूल्यांकन गर्न भने । कामै नभएको मूल्यांकन गर्न मानिनँ । त्यसपछि उनले आफूलाई कोठाभित्रै हातपात गरे ।’

हुसैनले आफूलाई कुट्दै आफ्नो मोवाइल समेत खोसेको उनले बताए ।

हुसैनले भने झालाई कुटपिट नगरेको बताए । उनले मोवाइल भने नियन्त्रणमा लिएको बताए । ‘लिएको मोवाइल पनि फिर्ता गरिसकेको छु । कुटपिट गरेको छैन’ उनले भने । यसैबीच झामाथि कुटपिट गरेको विरोधमा कर्मचारीले शुक्रबार नगरपालिकाको कामकाज अवरुद्ध गरेका छन् ।