कोपा अमेरिका : अर्जेन्टिना क्वाटरफाइनलमा प्रवेश

दक्षिण अमेरिकी महादेशीय फुटबल प्रतियोगिता कोपा अमेरिकामा अर्जेन्टिना क्वाटरफाइनलमा प्रवेश गरेको छ ।

नेपाली समय अनुसार आज विहान भएको खेलमा पाराग्वेलाई १-० को गोल अन्तरले पराजित गर्दै अर्जेन्टिना समूह ए बाट क्वाटरफाइनलमा प्रवेश गरेको हो ।

आज सम्पन्न खेलमा अर्जेन्टिनाका लागि अलेजान्द्रो गोमेजले दशौं मिनेटमा गरेको गोल नै निर्णायक बन्यो । उनले एंगेल डी मारियाको पासमा गोल गरेका थिए । समूह ए को आफ्नो पहिलो खेलमा चिलीसँग बराबरी खेलेको अर्जेन्टिनाले दोस्रो खेलमा उरुग्वेलाई १-० ले हराएको थियो । उसले ३ खेलबाट ७ अंक जोडेको छ ।

दुई खेल खेलेको पाराग्वेको भने ३ अंक छ । उसले पहिलो खेलमा बोलिभियालाई पराजित गरेको थियो । आज विहानै भएको यही समूहको अर्को खेलमा चिली र उरुग्वेले १-१ गोलको बराबरी खेल्दै अंक बाँडेका छन् । खेलको २६ औं मिनेटमै इडुरो भार्गासले गोल गरी चिलीलाई अग्रता दिलाएका थिए ।

६६ औं मिनेटमा अटूरो भिडालले आत्मघाती गोल उपहारमार्फत उरुग्वेले बराबरी गर्न सक्यो । चिली ३ खेलबाट ५ अंकसहित समूह ए को दोस्रो स्थानमा छ । उरुग्वेले २ खेलबाट १ अंकमात्र जोड्न सकेको छ ।

१० देश सहभागी कोपा अमेरिकामा २ समूहमा खेलाइएको छ । हरेक समूहको शीर्ष चार टोलीले क्वाटरफाइनल खेल्नेछन ।