४० वर्षमुनिका युवालाई प्राथमिकतामा राखी ९९ केन्द्रीय सदस्य थप्दै माओवादी केन्द्र

८ असार,काठमाण्डौ – नेकपा माओवादी केन्द्रले ४० वर्षमुनिका युवालाई प्राथमिकतामा राख्दै केन्द्रीय समितिमा ९९ सदस्य थप्ने तयारी गरेको छ ।

एमालेसँगको पार्टी एकता सर्वोच्चले भङ्ग गरिदिएपछि माओवादी हाल नयाँ सङ्गठन निर्माणको तयारीमा छ । पार्टीको प्रस्तावित नयाँ विधानमा केन्द्रीय समिति २९९ सदस्यीय बनाउने उल्लेख छ । सो विधान केन्द्रीय समितिको बैठकबाट पारित भएपछि लागू हुने छ ।

संगठनबारे सुझाव सङ्कलन गर्न गठित ६ सदस्यीय कार्यदलका एक सदस्य मातृका यादवले २ सय सदस्यीय केन्द्रीय समितिमा ९९ सदस्य थप्न सुझाव दिइएको बताए । ‘नयाँ सदस्य थप्ने क्रममा ४० वर्षमुनिका युवालाई प्राथमिकता दिइने छ,’ उनले भने। केन्द्रीय सदस्य थपिँदा महिलालाई ३५ प्रतिशत र दलितलाई १५ प्रतिशत कोटा छुट्याइएको पनि उनले जानकारी दिए ।

त्यस्तै कार्यदलका अर्का सदस्य जनार्दन शर्मा (प्रभाकर)ले पनि २० प्रतिशत युवालाई केन्द्रीय समितिमा स्थान दिन सुझाव दिइएको बताएका छन् ।