गएराती मेलम्च खोलाको बाढीले हेलम्बु प्रहरी चौकी ढाल्यो

५ असार,हेलम्बु – शुक्रबार साँझ सिन्धुपाल्चोकको हेलम्बुमा मेलम्ची खोलामा गएको बाढीले इलाका प्रहरी कार्यालय हेलम्बुको कार्यालय ढलाएको छ ।

हिजो शुक्रबार साँझ दोश्रोपटकको मेलम्ची खोलामा गएको बाढीले इलाका प्रहरी कार्यालय हेलम्बुको कार्यालयको आरसिसि पक्कि भवन ढलाएको हो  ।  भवनसँगै कार्यालयको केही सामानहरू पनि बगाएको प्रहरीले जनाएको छ । ‘सुरुको दिनमा किचन र ट्वाइलेट ढलाएको थियो  ।  शुक्रबार रातिको बाढीले भवन पनि ढले,’ इप्रकामा कार्यरत हबल्दार इन्द्र अधिकारीले जानकारी दिए ।

केही महत्वपूर्ण सामानहरू भने पहिल्यै नै सुरक्षित स्थानमा सारिएको उनले जानकारी दिए । ‘अहिले हामीले माथि एक जना स्थानीयको घरमा राखेका छौं,’ उनले भने ।

त्यसैगरी शुक्राबारको बाढीले ग्याल्थुम बजारस्थित इस्ट प्वाइन्ट एकेडेमी नामक बोर्डिङ स्कुलको भवन पनि ढलाएको गाँउपालिका अध्यक्ष निमा ग्याल्जेन शेर्पाले जानकारी दिए । थप क्षतिबारे अनुसन्धान भइरहेको प्रहरीले जनाएको छ ।