जनप्रतिनिधीबाटै निषेधाज्ञाको उल्लंघन : मेयर र वडाध्यक्ष नै उद्घाटन कार्यक्रममा व्यस्त

२० जेठ,कैलाली – कोरोना भाइरसको रोकथाम तथा नियन्त्रणका लागि कैलाली जिल्लामा गत वैशाख १६ गतेदेखि स्थानीय प्रशासनले निषेधाज्ञा जारी गरेको छ । बिहीबार मात्रै प्रमुख जिल्ला अधिकारी खगेन्द्रप्रसाद रिजालले कोरोना भाइरसको जोखिम कायमै रहेको भन्दै आगामी जेठ ३१ गतेसम्म निषेधाज्ञालाई निरन्तरता दिने आदेश जारी गरेका छन् ।

प्रमुख जिल्ला अधिकारीबाट जारी भएको आदेशमा निषेधाज्ञा अवधिभर कुनै प्रकारका सभा, सम्मेलन, गोष्ठी, सेमीनार तथा मानिसको भीडभाड हुने कार्यक्रम गर्न नपाइने उल्लेख छ । तर कैलालीको लम्कीचुहा नगरपालिकामा भने नगरपालिकाका जनप्रतिनिधिहरुबाटै प्रशासनको आदेश विपरीत मानिसहरु भेला गराएर उद्घाटन कार्यक्रममा सहभागी गराई निषेधाज्ञाको उल्लंघन भएको छ ।

स्थानीय प्रशासनले जारी राखेको निषेधाज्ञाको नगरपालिकाका मेयर महादेव बजगाइँ र वडा नम्बर १ का वडाध्यक्ष जनक बमले उल्लंघन गरेका हुन् ।

मेयर बजगाइँ र वडाध्यक्ष बमले स्थानीय प्रशासनले जारी गरेको निषेधाज्ञाको उल्लंघन गर्दै जनप्रतिनिधि, कर्मचारी र स्थानीयको भेला गराएर बिहीबार बिहान लम्कीचुहा वडा नम्बर १ मा रहेको निर्मित बसपार्कको उद्घाटन गरेका हुन् भने वडा नम्बर १ को कार्यालय भवन र स्वास्थ्य इकाइ केन्द्रको भवनको समेत उद्घाटन गरेका छन् ।

उध्घाटन कार्यक्रममा ठूलो संख्यामा मानिसहरु सहभागी भएका थिए । उक्त कार्यक्रममा वडा नम्बर १ का वडाध्यक्ष जनक बम लगायत अन्य जनप्रतिनिधिहरु पनि सहभागी भएका थिए ।

प्रजिअबाट जारी भएको आदेशमा पनि निषेधाज्ञा अवधिभर कुनै प्रकारका सभा, सम्मेलन, गोष्ठी, सेमीनार तथा मानिसको भीडभाड हुने कार्यक्रम गर्न नपाइने उल्लेख गरिएको छ । तर प्रशासनको आदेश विपरीत मानिसहरु भेला गराएर उद्घाटन कार्यक्रम सहभागी भएको विषयमा प्रतिक्रिया माग्दा मेयर बजगाई र वडाध्यक्ष बमले फोन उठाएनन् ।

कैलालीका सहायक प्रमुख जिल्ला अधिकारी हिरालाल चौधरीले जनप्रतिनिधिहरुबाट निषेधाज्ञाको उल्लङ्घन हुनु दुःखद पक्ष भएको बताए । ‘जागेको मान्छेलाई जगाउन साह्रै गाह्रो हुँदो रहेछ । जनप्रतिनिधिहरुले महामारीबाट बच्न आम नागरिकलाई सचेत गराउने पर्ने बेलामा आफै भेला गर्नुहुन्छ भने हामीले के भन्ने,’ सहायक प्रमुख जिल्ला अधिकारी चौधरीले अनलाइनखबरसँग भने, ‘तर लम्कीचुहाको विषयमा जानकारी थिएन । हामीलाई खबर प्राप्त भए रोक्न लगाइहाल्छौँ ।’

उनले कोरोना भाइरसको जोखिम कायमै रहेका कारण भीडभाड गर्न र गराउने कार्यमा सहभागी नहुन पनि सबैलाई आग्रह गरेका छन् ।