माओवादी केन्द्रका नेतामाथि मध्यरातमा गोली प्रहार

६ जेठ,कपिलवस्तु – कपिलवस्तुमा नेकपा माओवादी केन्द्रका नेतामाथि अज्ञात समुहबाट गोली प्रहार भएको छ।

बुधबार राति करिब ११ बजेतिर माओवादीका जिल्ला सदस्य दीपक पाण्डेमाथि गोली प्रहार भएको प्रहरीले जनाएको छ। प्रहरीका अनुसार गोली प्रहारबाट उनको पेट(बाँयातिरको कम्पर)मा चोट लागेको छ।

तौलिहवा – जितपुर सडकखण्डमा पर्ने सडवामा गोली प्रहार भएको र गोली प्रहार गर्ने समूहको पहिचान हुन नसकेको जिल्ला प्रहरी कार्यालयका प्रमुख प्रहरी उपरीक्षक नवराज अधिकारीले जानकारी दिए।

पाण्डेसँगै मोटरसाइकलमा सवार भारतीय नागरिक इराज अख्तर मुलसमानको पाखुरामा गोली लागेको छ । तौलिहवातर्फ जादै गरेका पाण्डेलाई एउटा मोटरसाइकलमा आएका ३ जनाको समूहले मोटरसाइकल रोकेर गोली हानेको प्रहरीले बताएको छ।