ला लिगा : घरेलु मैदानमा बार्सिलोनाको सानदार जित

एजेन्सी –  स्पेनिस ला लिगामा गएराती भएको खेलमा क्याटलान क्लब बार्सिलोनाले आफ्नै घरेलु मैदानमा गेटाफेमाथि सानदार जित हासिल गरेको छ ।

क्याम्प नोउमा भएको खेलमा बार्सिलोनाले गेटाफेलाई ५ – २ ले हराएको हो । बार्सिलोनाको लागी मेस्सीले दुई तथा रोनाल्ड एराउजो र एन्टोइन ग्रिजमनले एक गोल गरेका थिए । एक गोल भने उपहार पाएको थियो । गेटाफेका लागी इनेस युनालले एक गोल गर्दा एक गोल उपहार पाएको थियो ।

खेलको आठौं मिनेटमा बार्सिलोनाले कप्तान लियोनेल मेस्सीको गोलबाट अग्रता लिएको थियो । १२औं मिनेटमा क्लेमेन्ट लेङ्लेटले आत्मघाती गोल गरेपछि खेल १–१ गोलको बराबरीमा पुगेको थियो । २८औं मिनेटमा सोफियन चाक्लाले आत्मघाती गोल गरेपछि बार्सिलोना खेलमा २–१ ले अघि बढ्यो । ३३औं मिनेटमा कप्तान लियोनेल मेस्सीले व्यक्तिगत दोस्रो तथा टोलीका लागि तेस्रो गोल गर्दै बार्सिलोनालाई पहिलो हाफमा ३–१ ले अघि बढाए । ६९औं मिनेटमा इनिस युनालले गोल गर्दै खेललाई ३–२ को अवस्थामा ल्याए ।

८७औं मिनेटमा रोनाल्ड एराउजोले मेस्सीको पासमा गोल गर्दै बार्सिलोनालाई जिततर्फ अघि बढाए । इन्ज्युरी समयको थप गरिएको तेस्रो मिनेटमा एन्टोइन ग्रिजमनले पेनाल्टीमा गोल गर्दै बार्सिलोनालाई ५–२ को फराकिलो जित दिलाए ।

यस जितसँगै बार्सिलोना ३१ खेलबाट ६८ अंक जोडेर तेस्रो स्थानमा उक्लिएको छ ।