सभामुख अग्नि सापकोटामाथि खनिए प्रधानमन्त्री ओली

४ बैशाख,काठमाण्डौ – प्रधानमन्त्री केपी शर्मा ओली सभामुख अग्नि सापकोटामाथि खनिएका छन् ।

आज शनिवार प्रधानमन्त्री ओलीले बोलाएको ‘सर्वदलीय बैठकका क्रममा सभामुख सापकोटामाथि ओली खनिएका हुन् । संसदीय काम कारबाहीमा सभामुखले भाँजो हालेको आरोप लगाउँदै उनकै कारण संसद बन्दक बनेको प्रधानमन्त्री ओलीले आरोप लगाए । प्रधानमन्त्री ओलीले सभामुखको अराजकताले सरकारले कामै गर्न नसकेको समेत दावी गरे ।

बैठकमा सहभागी भएर बाहिरिएका राप्रपा अध्यक्ष डा प्रकाशचन्द्र लोहनीले ओलीले सभामुखको भूमिकामाथि प्रश्न उठाएको जानकारी दिए । ‘सभामुख अराजक बन्नुभयो, उहाँले संसदलाई बन्धक बनाएर सरकारलाई कामै गर्न दिनुभएन भन्ने प्रधानमन्त्रीको भनाइ रह्यो’, डा लोहनीले प्रधानमन्त्रीको भनाइ उदृत गर्दै भने,‘ यसको निकाश कसरी खोज्ने भनेर दलहरुसँग राय माग्नुभयो । सर्वदलीय बैठकमा उहाँले सभामुखप्रति आक्रोश पोख्नुभयो । ’ लोहनीले भने ।

बैठकमा आफूले राजनीतिक विकास खोजेर कोरोना नियन्त्रण लगायतका महत्वपूर्ण काममा लाग्न सरकारलाई सुझाव दिएको समेत डा लोहनीले बताए । बैठकमा ओलीले कोरोनाको दोस्रो लहरविरुद्ध कसरी लड्ने भनेर सुझाव समेत मागेका थिए ।

प्रधानमन्त्रीको सर्वदलीय बैठक बालुवाटारमा सुरु : प्रचण्ड, माधव, झलनाथ र बाबुराम अनुपस्थित्