भोलि प्रतिनिधिसभा बैठक बस्दै : यस्तो छ कार्यसूची

५ चैत्र,काठमाण्डौं –  प्रतिनिधिसभा बैठक भोलि (शुक्रबार) पनि बस्ने भएको छ ।

संघीय संसद महासचिव डा. भरतराज गौतमले आज एक सार्वजनिक सुचना जारी गर्दै भोली प्रतिनिधिसभा बैठक बस्ने जानकारी गराएका हुन् । महासचिव डा. गौतमका अनुसार उक्त बैठकको सम्भावित कार्यसूची तय भएर आज सार्वजनिक भएको हो । त्यस्तै बैठक भोलि (शुक्रबार) दिनको ठिक एक बजे बस्ने छ ।

भोलि बस्ने उक्त बैठकमा प्रधानमन्त्री केपी शर्मा ओलीले लोकसेवा आयोगको ६१औँ वार्षिक प्रतिवेदन २०७७ र राष्ट्रिय मानवअधिकार आयोगको आर्थिक वर्ष २०७६ र ०७७ को वार्षिक प्रतिवेदनसमेत पेश गर्ने कार्यसूचीमा उल्लेख गरिएको छ ।

साथै, सभामुख अग्निप्रसाद सापकोटाले पनि पूर्व राष्ट्रियसभा सदस्य एवं संविधानसभा सदस्य अशोक कोइरालाको निधनमा शोक प्रस्ताव प्रस्तुत गर्ने कार्यसूचीमा जनाइएको छ । सर्वोच्च अदालतबाट प्रतिनिधिसभा पुनःस्थापना भएपछि हालसम्म तीनवटा बैठक बसेको छ ।