ठेक्का सम्झौताको दुई वर्षपछि बल्ल पुल निर्माण सुरु

२७ माघ,काठमाण्डौं – राजधानी काठमाण्डौंमै ठेक्का सम्झौताको दुई वर्षपछि बल्ल पुल निर्माण सुरु हुन लागेको छ ।

चक्रपथको कोटेश्वर-कलङ्की खण्डमा तीन आकाशे पुलको निर्माण ठेक्का सम्झौता भएको दुई वर्षपछि सुरु हुन लागेको हो। चक्रपथको कोटेश्वर-कलङ्की खण्डको ६ स्थानमा आकाशे पुल निर्माण सुरु गरिएकोमा यी तीन स्थानमा डिजाइनमा नै समस्या भएकाले विगतका वर्षहरुमा निर्माण हुन नसकेको काठमाडौं चक्रपथ सुधार योजनाले जनाएको छ ।

चीन सरकारको आर्थिक सहयोगमा निर्माण भएको सो सडकमा नेपाल सरकारले एक/एक किलोमिटरको दूरीमा पर्ने गरी छ स्थानमा आकासे पुल निर्माण सुरु गरेको थियो । महालक्ष्मीस्थान, बल्खु र सानेपामा अहिले यी पुलको डिजाइन सच्याएर निर्माण अघि बढाइरहेको योजनाका प्रमुख अर्जुन सुवालले बताए । उनका अनुसार निर्माण व्यवसायीका कारणले नभएर यी पुल निर्माण सडक विभाग र योजना कार्यालयकै कारण ढिलाइ भएको हो । यी पुलको निर्माण एउटै कम्पनीमार्फत भइरहेको छ ।

डिजाइनको समस्या हटाइएकाले अब लामो समय नलाग्ने उनले बताए । गत महिनामा अवधि सकिएको भए पनि पुल निर्माणमा थप छ महिना थपिएको छ । उनले भने, ‘असार मसान्तसम्ममा नै पुल निर्माण भइसक्ने देखिएको छ ।’ यसअघि नै सातदोबाटो, बालकुमारी र एकान्तकुनामा पुल निर्माण सम्पन्न भएर प्रयोगमा आइसकेको छ । चीन सरकारको सहयोगमा निर्माण भएको सो सडकमा पहिले तीन स्थानमा मात्रै आकाशे पुल निर्माण गर्ने गरी डिजाइन तयार भएको थियो ।

सोही आधारमा चिनियाँ कम्पनीले कोटेश्वर, ग्वार्को र बागडोल गरी तीन स्थानमा पुलको निर्माण गरेको थियो । आठ लेन चौडाइको सो सडकमा सवारी साधनको गति उच्च हुने भएकाले पैदल यात्रुका लागि थप आकाशे पुलको आवश्यकता भएको भन्दै विभागले थप छ स्थानमा पुल निर्माण अघि बढाएको थियो ।

चीन सरकारले सडक हस्तान्तरणपछिको एक वर्ष मर्मत अवधि चलिरहँदा विभागले पुल निर्माण सुरु गरेको थियो । चक्रपथको पहिलो खण्डमा कम सङ्ख्यामा पुल भएकाले समस्या भएकाले विभागले विस्तारको क्रममा रहेको चक्रपथको दोस्रो खण्ड कलङ्कीबाट गोपीकृष्ण हल अगाडिसम्म प्रत्येक एक किमीमा एउटा आकाशेपुलको प्रस्ताव गरेको छ । झण्डै १० किमी लम्बाइको सडकमा नौ आकाशे पुल निर्माण गर्ने गरी डिजाइन भएको छ ।